DILI, 09 setembru 2024 (TATOLI)–Diretór Servisu Munisipal Jestaun Merkadu no Turizmu, iha Autoridade Munisipál Dili (AMD), Arthur Henriques, hateten diresaun jestaun merkadu iha AMD presiza osan rihun $5 hodi bele hadi’a viatura operasionál jestaun merkadu nian ne’ebé aat hela.
Notísia Relevante: Karreta operasionál neen aat difikulta servisu jestaun merkadu kontrola negosiánte sira
“Osan ne’e atu hadi’a travaun no troka óleo viatura hitu ne’ebé agora paradu hela hodi bele retoma serbisu operasionál ba merkadu. Prosesu administrasaun mak atrazu uitoan, serbisu administrasaun mak la’o hanesan ne’e. Ami hato’o hotu ona ba superiór sira, entaun fíó impaktu ba serbisu,” Diretór Servisu Munisipal Jestaun Merkadu no Turismu iha Autoridade Munisipál Dili (AMD), Arthur Henriques, hateten ba Agência Tatoli, iha Matadoru.
Dadaun ne’e, nia hateten, ekipa jestaun merkadu la’o kontrola nafatin maibé labele halo intervensaun ba negosiante sira-ne’ebé kontinua faan sasán iha espasu públiku.
Nia dehan, reparasaun ba karreta operasionál sira-ne’e sei la’o durante semana ida hanesan iha iha semana ida-nia laran iha ofisina hodi kontinua halo operasaun.
“Iha outubru nia laran, dalaruma iha semana rua mai mak sei halo fali operasaun ba merkadu sira iha kapital hodi haree no organiza vendedór sira. Semana oin hanesan ne’e mak bele halo reparasaun ba viatura sira-ne’e,” nia hateten.
Prezidente Interinu Autoridade Munisipal Dili (AMD), Francisco dos Santos, hateten ekipa jestaun merkadu hatama pedidu mai iha lojistika mak depois mak sei hare, buka atu responde ba preukupasaun ne’e.
“Ida-ne’e sira husi jestaun merkadu nian hatama pedidu ba iha lojistika no hato’o mai iha ne’e mak haree, buka atu responde,” nia dehan.
Jornalista : Jesuína Xavier
Editór : Cancio Ximenes
