DILI, 17 outubru 2024 (TATOLI)–Xefe Departamentu Saneamentu iha Autoridade Munisípiu Dili (AMD), Domingos dos Santos Soriano, hateten AMD seidauk hetan responsabilidade ba jardín iha Palásiu Governu nia oin hodi halo manutensaun hodi rega ai-funan sira iha jardin ne’e loro-loron.
Notísia Relevante: Autoridade Dili prevee $100.000 sosa karreta tanke rega jardín iha kapitál
“Provizoriumente, jardin ne’e Ministériu Ambiente no Turizmu nia responsabiliade. Iha jardin balun mak pesoál turizmu mak rega no dasa hanesan Palásiu Governu, Largo Lecidere, Motael 5 de Maiu rua no Mandarin,” Xefe Departamentu Saneamentu iha Autoridade Munisíu Dili (AMD), Domingos dos Santos Soriano, hateten ba Agência Tatoli, relasiona ho ai-funan balun ne’ebé mate iha jardin Palásiu Governu nia oin ne’ebé ema publika iha rede sosiál, kuarta ne’e.
Xefe departamentu ne’e relata, AMD nia responsabilidade mak halo manutensaun hodi rega ai-funan sira iha jardin iha Hudi Laran to’o Elemloi, Lider nian ba to’o Elemloi ka Canossa no Palásiu Prezidensiál Bairru Pite nia oin to’o rotunda Nicolau Lobato Comoro.
AMD nia responsabilidade seluk tan, nia dehan, tau matan ba jardin foun sira-ne’ebé AMD mós agora tau-matan hela mak jardín iha Ministériu Administrasaun Estatál oin, jardin iha Faról, Kampung Alor no Jardín ida iha Timor Lodge nia oin iha Comoro.
“Daudaun ne’e ami responsabiliza ba ida-ne’e. Entaun, ai-funan sira iha jardin ne’e ami rega ona, tanba sira husu apoiu,” nia hateten.
Jornalista : Jesuína Xavier
Editór : Cancio Ximenes
