PAM Bobonaro husu joven sira kria pas – dame durante Finadu
BOBONARO, 30 outubru 2024 (TATOLI)-Prezidente Autoridade Munisípiu Bobonaro, Alexandrino Pires, husu ba komunidade no joven sira atu kria pas no dame durante selebrasaun loron Finadu.
Tuir nia, finadu la’ós festa, maibé nu’udar kustume no identidade Timor nia ne’ebé hanesan loron importante ba família sira atu fó omenajen ba matebian ka saudozu sira ne’ebé husik ona mundu.
Notisia Relevante:Membru PN husu PNTL garante seguransa iha loron finadu
“Munisípiu Bobonaro ita hotu nia, ita-nia moris-fatin, husu ita hotu atu respeita malu, labele kria konflitu, di’ak liu ita hamutuk ita kombate konflitu, duké ita haburas konflitu, tanba konflitu la lori situasaun di’ak ba ita, kontente ba ita, ikus mai inan-aman sai vítima, entaun di’akliu hakbri violensia, ita hakiak-hadomi pas no establidade,” nia informa ba jornalista sira iha salaun Maria-Tapo, kuarta ne’e.
Pires mós fó hanoin ba komunidade hotu bainhira viajen ba idak-idak nia knua tenke ho disiplina, labele hemu-tua hodi provoka malu.
“Ba misa, fila husi Igreja, lori ai-funan ba semitériu, la’o ho didi’ak nu’udar umanu ne’ebé atu bá vizita inan-aman ka avo sira ne’ebé liu tiha ba mundu seluk,” nia hakotu.
Enkuantu tuir observasaun Jornalista TATOLI iha kapitál Maliana nota katak volume movimentasaun transporte públiku no privada maka’as hahú segunda to’o ohin kuarta (30/10) ne’e, balu mai husi Dili no balu husi kapitál Maliana fila ba idak-idak nia knua iha postu administrativu neen, suku 50, aldeia 193.
Notísia relevante: PNTL Bobonaro husu komunidade mantein páz iha loron finadu
Jornalista: Sérgio da Cruz
Editór: Evaristo Soares Martins
