COVALIMA, 12 Novembru 2024 (TATOLI) – Pároku Igreja Ave Maria Suai, Padre Sebastião Eugénio Correia, husu ba joven-sira atu hamoris nafatin espíritu unidade, tanba liuhusi unidade mak Timor-Leste bele hetan independénsia.
“Ohin, ita komemora Loron Nasionál Juventude ne’ebé uluk fó aan ba mate, iha 12 Novembru 1991. Tan ne’e, presiza atu hamoris nafatin espíritu unidade, tanba liuhusi unidade ita bele hetan independénsia”, Padre Sebastião haktuir iha nia omília bainhira prezide misa agradesimentu ba 12 Novembru, iha Igreja Ave Maria Suai.
Saserdote ne’e apela mós ba líder partidu polítiku no organizasaun-sira atu harii unidade, tanba ida ne’e mak lori ema iha esperansa ba liberdade, kuandu laiha unidade no fahe malu, sei laiha esperansa.
“Ita hakarak kore povu husi ki’ak no mukit, importante iha unidade, maske ita-nia ideolojia partidu la hanesan, maibé ita mesak timoroan”, nia fó hanoin.
Timor-Leste harii ho ruin no raan ne’ebé naklekar liuhusi unidade maka presiza iha nasionalizmu no patriotizmu hodi luta ba dezenvolvimentu.
Tuir padre nia observasaun, joven-sira kria grupu barak, nune’e ema idaidak luta ba nia grupu atu grupu ne’e moris, iha podér no bele sai boot, tanba ne’e halo joven-sira lakon unidade.
Notísia relevante: 12 Novembru fanu joven sira atu afirma nasionalizmu no patriotizmu
“Joven-sira agora laiha unidade, tanba akompañia husi notísia, joven-sira husi eskola ida tuda fali eskola sira seluk tanba de’it agora laiha espíritu unidade. Ita-nia joven-sira la unidade ne’e mai husi lideransa ne’ebé harii partidu hodi halibur joven-sira husi grupu oioin, la’ós atu kria unidade, maibé halibur joven-sira partidária no la’ós atu halo dezenvolvimentu”, amu preokupa.
Nia husu ba foinsa’e sira presiza atu hatene kona-ba istória no respeita istória hanesan Masakre Santa Krús no sira seluk, tanba liuhusi istória mak bele hafanun sira atu kria unidade.
Notísia relevante: Autoridade Covalima kari ai-funan iha monumentu Masakre Setembru Negro 1999
Jornalista: Celestina Teles
Editora: Maria Auxiliadora
