OÉ-CUSSE, 18 Novembru 2024 (TATOLI) – Institutu Nasionál Administrasaun Públika (INAP) disponibiliza formasaun ba funsionáriu na’in-188 iha Rejiaun Administrativa Espesiál Oé-Cusse Ambeno (RAEOA) hodi prepara sira ba implementa Desentralizasaun Administrativa no Podér Lokál.
Diretór Rejionál Formasaun no Kapasitasaun, Sekretaria Rejionál ba Asuntu Administrasaun, Salvador da Cruz, informa katak partisipante iha atividade ne’e iha grupu rua, ida mak funsionáriu na’in-51 no seluk mak hudi diretór, xefe departamentu no xefe seksaun hamutuk na’in-67.
Objetivu jerál husi formasaun ne’e mak atu hakbiit funsionáriu públiku sira no ajente administrasaun públiku, nune’e bele fó atendimentu públiku ne’ebé di’ak ba komunidade.
“La kle’ur tan Governu implementa ona polítika podér lokál, entaun persiza ita-nia funsionáriu atu prepara-aan. Bainhira ita estabelese ona, entaun ita preparadu atu koloka de’it sira, tan ne’e mak prepara rekursu umanu hahú agora liuhusi formasaun no kapasitasaun”, dehan.
Notísia relevante: Xefe suku 18 aprofunda koñesimentu sobre jestaun lideransa no administrasaun
Polítika formasaun ne’e, Autoridade RAEOA, liuhusi Sekretaria Rejionál ba Asuntu Administrasaun mak hato’o pedidu ba INAP atu fó formasaun no nia alvu mak autoridade komunitária no funsionáriu sira.
“Ida ne’e mak ita-nia preparasaun ba futuru implementasaun podér lokál, entaun ita tenke hahú agora forma ita-nia rekursu umanu”, realsa.
Diretór Finansa husi INAP, Belarmino Amaral, esplika katak atividade formasaun ne’e perkorre ona munisípiu 13, inklui RAEOA. Atividade ne’e iha programa rua mak kona-ba formasaun téknika lideransa no jestaun eskritóriu.
“Formasaun rua ne’e importante ba funsionáriu sira atu atu hatene sira-nia knaar loloos, saida mak bele halo no saida mak labele halo. Ba tékniku lideransa, ita tenke prepara ona ita-nia funsionáriu sira karik iha futuru sira balun assume kargu xefia, sira tenki hatene ona saida mak atu halo. Ida fali kona-ba programa jestaun eskritóriu nian, ita tenke fó ona formasaun ba funsionáriu sira, nune’e bele hatene sira-nia knaar loroloron, saida mak sira atu halo, liuliu ba iha atendidimentu públiku”, nia hateten.
Notísia relevante: Kualifika rekursu umanu sai prioridade ba Edukasaun Oé-Cusse iha 2025
Formasaun ne’e hala’o durante semana ida, hahú segunda,18 Novembru, no sei termina iha sesta, semana ne’e.
Jornalista: Abílio Elo Nini
Editora: Maria Auxiliadora
