DILI, 24 novembru 2024 (TATOLI)–Governu liuhusi Sekretaria Estadu Komunikasaun Sosiál (SEKOMS) apoiu osan $8.000 ba Organizasaun Uniaun Profisaun Jornalista Timor-Leste (UPJTL) hodi realiza formasaun no sosa ekipamentu hodi hala’o atividade.
“Ita hetan apoiu husi SEKOMS no osan ida-ne’e ita halo transparante, osan ne’e uza balun ba formasaun durante loron-rua nian, hodi sosa komputadór tolu, impresora ida no projetór, ne’ebé ita-nian hotu, karik iha kolega balun mak hakarak uza bele maibé importante mak tenke kuidadu,” Prezidente UPJTL, Horácio Afonso Fátima Babo, hateten, hafoin ensera formasaun kona-ba papel mídia iha prosesu dezenvolvimentu no utilizasaun mídia ho responsabildade, iha salaun ETDA, Fatuhada, domingu ne’e.
Notísia relevante : UPJTL fasilita formasaun kona-ba papel mídia iha prosesu dezenvolvimentu ba jornalista
UPJTL hanesan organizasaun naun lukrutivu ne’ebé moris atu fó mahon ba jornalista sira.
“Kooperasaun ne’e importante maibé agora ne’e ami foka halo advokásia ba públiku katak knaar jornalista importante no sai xave importante ba prosesu dezenvolvimentu,” nia akresenta.
Iha biban hanesan, Prezidente Konsellu Imprensa (CI, sigla portugés), Otélio Ote, apresia ho ezisténsia UPJTL maibé nia husu atu kria programa ida hodi ajuda jornalista sira.
“Kooperasaun nu’udar kondisaun ida hodi ajuda jornalista sira, liu-liu ba UPJTL rasik ba sustentanbilidade no propriedade, ida-ne’e mak importante tanba ita hatene katak ita-nia kondisaun realidade iha laran no kondisaun ekonomia mídia sira, entaun ita buka alternativa ida. Atubele kria buat ne’ebé bele lori benéfisia ba an rasik. Kona-ba ezisténsia UPJTL nian ha’u laiha dúvida tanba UPJTL tama liuhusi prosesu no legalmente,” nia katak.
Prezidente CI espera ba oin UPJTL bele kontinua serbisu buka identifika problema ne’ebé jornalista sira enfrenta no oinsá bele fasilita formasaun ba membru jornalista sira tanba durante formasaun loron-rua ne’e importante no apresia tebes.
Aleinde ne’e mós presiza halo referénsia ba grupu nune’e bele aumenta kapasidade ka hakbiit fali membru sira-nia kapasidade iha kada tirmestrál.
Isabel Armelit, husi mídia Timor Post, hateten, jornalista nia serbisu ne’e loron-loron, entaun liuhusi formasaun ne’e bele dezenvolve liután koñesimentu, la’ós iha produsaun notísia nian maibé bele hadi’a liután ein termu kualidade.
Jornalista : Osória Marques
Editora : Julia Chatarina
