iklan

EDUKASAUN, BOBONARU, MUNISÍPIU

Prezidente Autoridade Munisípiu Bobonaro promete harii rezidénsia ba profesór sira

Prezidente Autoridade Munisípiu Bobonaro promete harii rezidénsia ba profesór sira

Prezidente Autoridade Munisípiu Bobonaro, Alexandrino Pires, halo enkontru ho autoridade postu administrativu Bobonaro, funsionáriu públiku no líder komunitária sira hosi suku 18. Imajen Tatoli/Sérgio da Cruz.

BOBONARO, 10 janeiru 2025 (TATOLI) – Prezidente Autoridade Munisípiu Bobonaro (PAM), Alexandrino Pires, orienta ona Diresaun Terra, Propriedade (DTP) no Servisu Kadastru atu halo identifikasaun ba rai no uma estadu ne’ebé abandonadu nune’e ba futuru bele harii rezidénsia ba profesór destakadu sira iha suku 50, postu administrativu neen.

Autoridade munisípiu Bobonaro planeia atu kria kondisaun dignu, tanba profesór sira  ne’ebé husi munisípiu seluk destakadu iha munisípiu Bobonaro governu seidauk prepara kondisaun.

Notísia relevante: Profesór foun 91 aprezenta-aan ba Autoridade Bobonaro

“Ha’u promete nu’udar autoridade sei kria kondisaun ba imi, ha’u orienta ona Terras Propiedades identifika ona rai estadu no uma estadu parte edukasaun nia ne’ebé abandonadu, atu halo konstrusaun rezidénsia ba profesór sira. Ha’u halo esforsu iha períodu oin mai tama iha kámara munisípiu,” nia hateten iha serimonia natál konjunta entre Ministériu Edukasaun ho funsionáriu edukasaun munisípiu Bobonaro, ne’ebé realiza iha Jináziu Maliana, kinta ne’e.

Nia parte sei la asina pedidu transferénsia husi profesor ne’ebé hakarak muda ba munisípiu seluk.

“Ha’u-nia ema presiza ita-boot sira-nia tulun no presiza ita-boot sira-nia matenek, ha’u husu ita-boot sira atu hanorin nafatin, serbí ita-nia oan sira tanba sira mak futuru nasaun ida-ne’e nia atu troka ita sira agora ne’e,” nia katak.

Sekretáriu Estadu Ensinu Sekundáriu no Tékniku Vokasionál, Domingos Lemos, informa problema ne’ebé eskola no profesór sira iha Bobonaro hasoru governu sei rezolve ho neineik, tanba munisípiu hotu presiza Ministériu Edukasaun nia tulun.

Domingos Lemos apela ba profesór sira ho idade foinsa’e atu hanorin estudante sira ho responsabilidade no kuliadade tuir lei baze edukasaun atubele atinje meta ne’ebé governu define.

“Ita-nia kna’ar profesor ne’e vokasaun ida-ne’ebé ema seluk labele mai asume responsabilidade ida-ne’ebé iha, la fasil, ohin eema koloka imi mai husi Lospalos mai Bobonaro atu serbí rai ida-ne’e, atu hanorin ita-nia oan sira,” nia fó hanoin ba professor destakada sira.

Enkuantu profesor destakada iha munisípiu Bobonaro ne’ebé selesionadu iha vaga bolsa kandidatura hamutuk na’in 400-resin.

Notísia relevante: INFORDEPE hahú fó formasaun ba profesór kolokadu iha semana oin

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!