DILI, 14 janeiru 2025 (TATOLI)–Diretór Jestaun Merkadu no Turizmu iha Autoridade Munisipál Dili (AMD), Arthur Henriques, relata iha tinan 2024 ne’e AMD kasa no oho komunidade nia animál haki’ak hanesan Bibi no Fahi hamutuk 30-resin iha sidade Dili.
Notísia Relevante: Dili Day ba dala-254 ho lema Dili “MOS” no “BERTAISS”
“AMD ho ekipa konjunta oho animál sira hanesan bibi no fahi hamutuk 30-resin ne’ebé haki’ak iha uma no la’o livre iha área Pasir Putih no Tasi-Tolu. Naan sira-ne’e, ekipa ba entrega iha orfonatu sira balun iha Dili laran,” Diretór Jestaun Merkadu no Turizmu iha Autoridade Munisipál Dili (AMD), Arthur Henriques, hateten ba Agência TATOLI iha iha Matadoru.
Tan ne’e, nia husu ba komunidade atu labele husik animál iha kapitál Dili no haki’ak Bibi ka Fahi iha uma, tanba ida-ne’e hatudu imajen la di’ak no fó impaktu ba saúde públiku.
“Ami iha planu ba tinan ida-ne’e, tama-sai suku sira hodi fó avizu no sensibiliza populasaun nia konsiénsia atu labele husik no haki’ak animál iha área urbana, hodi labele haki’ak fahi,” nia hateten.
Diretór ne’e hateten, sei kontrola másmu fahi-luhan sira-ne’ebé harii besik uma ka iha komunidade nia leet ne’ebé ninia iis (dois) fó impaktu ba saúde públiku, entaun tenke fó hatene sira hodi sobu ka hasai.
Tuir nia, iha populasaun balun ne’ebé halo tuir avizu ekipa AMD nian hodi hasai rasik sira-nia animál haki’ak hodi ba haki’ak fali dook husi sidade, maibé komunidade balun sei haki’ak fali iha uma no husik animál sira la’o livre iha sidade laran.
Jornalista : Jesuína Xavier
Editór : Cancio Ximenes
