DILI, 14 janeiru 2025 (TATOLI)–Diretór Jestaun Merkadu no Turismu iha Autoridade Munisipál Dili (AMD), Arthur Henriques, informa Governu aloka ona osan rihun $350 hodi halo merkadu foun iha Manleuana.
Arthur Henriques garante konstrusaun ba merkadu foun ne’e halo iha merkadu kotuk hodi kria kondisaun ba vendedór sira, tanba espasu atuál seidauk sufisiente.
“Planu 2025 nian mak ne’e, AMD ho apoiu husi Ministériu Administrasaun Estatál no Ministériu Komérsiu no Indústria atu konstrui merkadu ida iha área ne’ebá. Iha ona orsamentu rihun $350 atu akumula ema fa’an iha liur,” Arthur Henriques ba Tatoli iha Matadouru.
Notísia relevante : https://tatoli.tl/2024/07/11/governu-aloka-rihun-10-reabilita-merkadu-manleuana/
Diretór ne’e hateten prosesu ba konstrusaun sei akontese tinan ne’e. “Ita hein halo de’it prosesu konkursu. Levantamentu dadus ba konstrusaun hotu ona,” nia dehan.
Molok ne’e Governu mós sosa ona rai ektare rua besik merkadu atuál Manleuana hodi akunula vendedór sira atu fa’an iha ne’ebá.
Jornalista : Jesuína Xavier
Editór : Cancio Ximenes
