iklan

OEKUSI

Edukasaun Oé-Cusse implementa merenda eskolár iha trimestre daruak

Edukasaun Oé-Cusse implementa merenda eskolár iha trimestre daruak

Diretór Edukasaun Rejiaun Administrativa Espesiál Oé-Cusse Ambeno (RAEOA), Vincencio Cono.Imajen/Abílio Elo Nini

OÉ-CUSSE, 16 Janeiru 2025 (TATOLI) – Diretór Edukasaun Rejiaun Administrativa Espesiál Oé-Cusse Ambeno (RAEOA), Vincencio Cono, informa, programa merenda eskolár iha Oé-Cusse sei hala’o iha trimestre daruak tanba daudaun ne’e CARE Hatutan sei kontinua implementa.

“ Daudaun ita sei la’o lai ho ai-han doador husi CARE Hatutan, tanba ita sei iha faze levantamentu, orsamentu iha primeiru trimestre ne’e seidauk iha ezekusaun ba merenda eskolár, ne’ebé orsamentu husi Estadu iha trimestre daruak mak ita foin bele hala’o,” Vincencio Cono, informa iah ámbitu enkontru ho manorin sira iha Oé-Cusse, ohin.

Notísia relevante:Ekipa Saúde observa merenda eskolár iha EBF 30 Agostu Masin falta ijiene

Durante 2024, Programa merenda eskolár implementa iha Oé-Cusse atinje 75%  kuaze la’o di’ak tanba fornesedór sira barak mak konstrui rasik koziña, koordenadór ho diretór eskola, servisu di’ak tebes ho fornesedór sira, maibé problema mak relatóriu atu submete mai edukasaun rejionál atraza.

Orsamentu ba programa merenda eskolár iha 2024 ba loron afetivu 40 aloka $305,306.40 ba estudante 18.173, kompostu husi Ensinu Pré-Eskolár (EPE) estusante 748 ho osan $12,566.40 no Ensinu Báziku (EB) estudante 17.425 ho osan $292,740.00.

“Tinan ne’e, ita sei halo fali levantamentu dadús estudante depois nia osan mós sei mudánsa kuandu estudante aumenta,” nia dehan.

Iha fatin hanesan, Koordenadór EBF 30 Agostu Masin, Belarmino Beto, dehan parte eskola simu de’it orientasaun, maibé orsamentu fornesedór mak jere bazea manuál ne’ebé iha.

Notísia relevante:Garante prosesu apredizajen, Edukasaun Oé-Cusse kria regulamentu hodi kontrola profesór sira

“ Orsamentu kona-ba programa merenda eskolár ne’e grupu fornesedór rasik mak ka’er, ami akompaña de’it ba administrasaun, bainhira iha erru ruma, ami ajuda tanba ne’e osan Estadu, ne’ebé merenda agora la’o hela iha eskola, tuir menu ne’ebé iha ona, hodi kontinua hein Governu nian,”  nia dehan.

Implementasaun merenda eskolár iha EBF 30 Agostu Masin, loron segunda to’o sesta-feira, alunu sira han-etu ho modo tahan, ai-fuan, monu-tolun no ikan, iha sábadu mak troka ho forremunggu tein hamutuk ho fehuk, hudi no susu-been.

Programa merenda eskolár nu’udar subsídiu ne’ebé fó iha ámbitu asaun sosiál eskolár, ho objetivu atu asegura direitu han loron-loron ho hahán saudavél, ekilibrada no indispensavél ba dezenvolvimentu no insentiva partisipasaun labarik sira iha edukasaun pré-eskola no iha ensinu báziku, públiku no partikulár hodi integra ba rede públika ne’ebé situa iha rai-laran hodi promove ninia prosesu ensinu-aprendizajén.

Entretantu, Ajénsia Tatoli asesu iha proposta Orsamentu Jerál Estadu (OJE) 2025 husi Sekretária Rejionál Edukasaun no Asuntu Sosiál prevista iha Transferénsias Publika ho montante $1,531,248 ka okupa 20,55% ho objetivu atu fornese konsensaun eskolár no merenda eskolar ba Ensino Basiku no Ensino Pré-Eskolár (EPE).

Nune’e mós iha programa edukasuan pré-eskolár ho alokasaun orsamentu $70,000 ka okupa persentajén 0.27% ho objetivu atu mellora kondisaun eskola no garantia prosesu aprendizajén nomós minimiza volume estudante.  Orsamentu referida atu halo konstrusaun Konstrusaun difísiu foun Ensinu Pré-eskolár (EPE) Fatubena iha suku Usitako.

Kona-bá programa Ensinu Básiku ho alokasaun orsamentu $180,000 ka okupa 0.69%, objetivu atu atu halo konstrusaun no reabilitasaun ba iha Ensinu Báziku Filiál (EBF) sira.

Notísia relevante:Komisaun G husu hadi’a implementasaun programa merenda eskolár iha OJE 2025

Jornalista: Abílio Elo Nini

Editór: Florencio Miranda Ximenes

iklan
iklan

Leave a Reply

iklan
error: Content is protected !!