OÉ-CUSSE, 16 Janeiru 2025 (TATOLI) – Diresaun Edukasaun Rejiaun Administrativa Espesiál Oé-Cusse Ambeno (RAEOA), kinta ne’e, hala’o enkontru ho dirijente eskola sira husi ensinu pré-eskolár, ensinu báziku to’o ensinu sekundáriu jerál no tékniku vokasionál, hodi prodús regulamentu ida nu’udar baze atu kontrola profesór sira durante prosesu aprendizajen.
“Ohin, ita konsege prodús ona formatu ida katak iha eskola tenke envia loron-loron mai iha Dirasaun Edukasaun, liuliu prezensa no auzente profesór sira iha eskola. Presiza sira akresenta naran mai ho kedan razaun, inklui lisensa karik tenke iha karta,” Diretór Edukasaun Oé-Cusse, Vincencio Cono, ko’alia iha salaun edukasaun Oé-Cusse, ohin.
Notísia relevante:Kualifika rekursu umanu sai prioridade ba Edukasaun Oé-Cusse iha 2025
Regulamentu ne’e, nia dehan hanesan estratéjia Dirasaun Edukasaun nian atu mantein informasaun kada loron ba eskola sira, katak loron ida-ne’e manorin sira halo prosesu aprendizajen ka la’e, ou prioritiza fali atividade extrakurrikulér nian, ne’ebé la tau importánsia ba sira-nia kna’ar loloos mak hanorin estudante sira iha eskola.

“La kumpre, iha nia lista prezensa, maske asina ona, maibé ami aneksa katak, iha loron hanesan ne’e profesór ne’e falta, no ami envia ba parte finansa hodi ko’a nia direitu salariál fulan nian, tanba tama loron servisu lahanesan entaun simu osan mós labele hanesan, tanba ne’e Estadu nia osan, ita labele halo korrupsaun,” nia dehan.
Profesór sira apoia regulamentu ko’a salariu
Iha fatin hanesan, Koordenadór EBF Reliqui Citrana sub-rejiaun Nítibe, Baptista da Cunha, orgullu tanba ho regulamentu ne’e bele mellora di’ak liután kualidade edukasaun liuliu garante prosesu apredijazen iha kada eskola sira.
“Ami-nia servisu tenke kumpre ami-nia kna’ar loloos, tanba atu garante kualidade edukasaun iha eskola ita tenke halo hanesan ne’e, ne’ebé ita apoia polítika ne’e, semak falta koa osan,” nia hateten.
Notísia relevante:Edukasaun Oé-Cusse apoia livru istória ba estudante CAFE
Entretantu, Koordenadór EBF 30 Agostu Masin sub-rejiaun Pante Makasar, Belarmino Beto, konsidera regulamentu ne’e importante, nune’e bele garante kualidade prosesu apredijazen iha eskola.

“Ne’e importante ba ami nu’udar edukadór, liuliu pontualidade tanba ita servisu, Governu mak selu, servisu ba sé? povu nia oan hanesan futuru nasaun ne’e nian, entaun regra ne’eb edukasuan estabelese ami apoia no agradese, ne’e atu regula ita hotu, tinan hirak kotuk mai atraza, lisensa barakliu no falta, di’akliu ko’a osan, tanba Estadu selu kompletu maibé servisu la kumpre, entaun ne’e tama korrupsaun ona,” nia apoia.
Tuir dadus, totál profesór ne’ebé Diresaun Edukasaun rejista hamutuk 784, kompostu husi permanente no kontratadu ho totál eskola públiku no privada hamutuk 114.
Notísia relevante:Xefe Estadu observa projetu sentru formasaun profesór iha Pante Makasar
Jornalista: Abílio Elo Nini
Editór: Florencio Miranda Ximenes