BOBONARO, 20 janeiru 2025 (TATOLI)—Servisu Rejistu no Verifikasaun Emprezariál, Institutu Publiku (SERVE,IP) Munisípiu Bobonaro, hahú husi janeiru to’o dezembru 2024, konsege rekolla ka kontribui reseita hamutuk $24,046 ba kofre Estadu.
Koordenadór SERVE, I.P Munisípiu Bobonaro, Leopoldo Pereira Fernandes, hateten reseita sira-ne’e halibur liuhusi atividade renovasaun sertidaun rejistu komersiál, kliente ne’ebé halo alterasaun ba objetu atividade, aumenta atividade, altersaun ba sede no kliente sira-ne’ebé halo ezersisiu aktividade ne’ebé sujeita ba lisensa setoriál ne’ebé iha obrigasaun selu taxa $60,00 kada atividade.
Notísia Relevante: 2023, SERVE Bobonaro rekolla rihun $14 ba kofre Estadu
“Husi totál ne’e, iha janeiru ne’e ami rekolla $1,624, fevereiru $1,909, marsu $1,227, abríl $3,252, maiu $2,453, juñu $1,909, jullu $2,572, agostu $1,705, setembru $1,290, outubru $2,583, novembru $1,180 no dezembru $1,326,” ho totál reseita hamutuk $24,046 mak ita rekolla iha tinan 2024,” Koordenador SERVE, I.P Munisípiu Bobonaro ne’e informa ba Agência Tatoli liuhusi WatsApp, segunda ne’e
Aleinde ne’e, nia dehan, hahú husi janeiru to’o dezembru 2024 ne’e SERVE, I.P Munisípiu Bobonaro mós konsege halo novu rejistu komersiál hamutuk 222 ne’ebé kompostu husi ENIN 163 no Unipesoál Limitada 59.
Antes ne’e, iha tinan 2023 ne’e, SERVE, I.P minisipiu Bobonaro rekolla reseita $14,459,14 no tinan 2022 hamutuk $8,258,45.
Notísia Relevante: Janeiru-juñu 2024, SERVE Bobonaro halibur reseita rihun $13-resin
Jornalista : Sergio da Cruz
Editór : Cancio Ximenes
