VIQUEQUE, 22 janeiru 2025 (TATOLI)—Xefe suku Maluru, postu administrativu Viqueque Vila, munisípiu Viqueque, Bendito Soares, husu Governu atu konstrui ponte Beaço ne’ebé kotu ne’ebé durante ne’e difikulta transporte públiku no ema halo movimentu ba-mai.
Notísia Relevante: Empreza Caicasa ho inisiativa rasik aterru ponte Beaço Viqueque
“Ponte Beaço ne’e ami hato’o beibeik ba Governu liuhusi Serbisu Ministériu Obra Públiku (MOP) munisípiu, maibé obra munisípiu dehan ba ha’u, ponte ne’e kompeténsia ministériu nian. Ponte ne’e, iha tempu udan sempre difikulta ita-nia komunidade ne’ebé halo viajén ba Uatucarbau no ba Uatulari,” Bendito Soares hateten ba Agência TATOLI iha postu administrativu Viqueque Vila, ohin.
Durante ne’e, tuir nia observasaun ba ponte Beaço liuliu iha tempu udan ne’e bainhira mota tun ona, komunidade tenke hein mota tun hotu mak foin bele hakur liu tanba mota ne’e liga ho bee-ain tasi ne’ebé Lafaek mós iha laran.
“Bainhira mota tun no bee menus ona mós, ita hakat no hakur liu mós ita tauk Lafaek. Liuliu ita-nia komunidade ne’ebé ho motorizada ne’e, atu hakur liu mota ne’e susar tebe-tebes. Tanba ne’e dalan nasionál, Ministériu Obra Públika mak responsável. Ne’ebé, ha’u husu ba ministru se bele hadi’a ona ponte hodi labele difikulta ita-nia komunidade nia movimentu entre Viqueque, Uatulari no Uatucarbau,” nia dehan.
Iha fatin seluk, Prezidente Autoridade Munisípiu (PAM) Viqueque, Francisco C. S de Gonzaga Soares, hateten ponte Beaço la’ós problema ba komunidade nian de’it maibé ponte sai problema ba ema hotu iha territóriu Viqueque nian.
“Problema sira-ne’e agora daudaun sei prosesa iha Konsellu Administrasaun Fundu Infraestutura (KAFI) nian liman. Depois, ita haree bainhira mak prosesu ramata. Tanba, ita munisípiu ne’e somente informa ba nasionál, tanba ita munisípiu la tau orsamentu. Hanesan infraestutura boot ne’e parte nasionál mak tau orsamentu no sira mak responsável. Tan ne’e, ha’u espera iha tinan ida-ne’e bele rezolve komunidade nia preokupasaun sira-ne’e,” nia dehan.
Notísia Relevante: Administrasaun Viqueque laiha orsamentu rezolve ponte Beaço kotu
Antes ne’e, Administradór sesante munisípiu Viqueque, Januário Soares ‘Bolly’, hateten, administrasaun munisipál laiha orsamentu sufisiente atu rezolve ponte Beaço ne’ebé kotu, ne’ebé liga ba dirasaun Viqueque vila bá postu administrativu Uatulari no Uatucarbau.
Tuir Autoridade munisipál ne’e, ponte ho naruk metru hitu (7) ne’e administrasaun munisipál bele foti desizaun hodi rezolve maibé orsamentu la prevee ba tinan (2022) ne’e, nune’e husu Servisu Ministériu Obra Públika (MOP) Viqueque submete pedidu ba MOP nasionál hodi fó resposta ba kestaun ne’e.
Ponte Beaço ne’e halo ona survei to’o ona iha postu Uatucarbau maibé atu halo manutensaun ba ponte ne’e laiha orsamentu entaun difulkta tebes ayu halo normalizasaun. Molok ne’e, Governu fó ba kompañia lokál rua (2) iha Viqueque mak atu halo rekuperasaun maibé kompañia rua ne’e hadau malu to’o agora ponte Beaço la hadi’a.
Orsamentu ne’ebé utiliza atu hadi’a ponte Beaço iha Viqueque ne’ e presiza orsamentu $60.000, maibé ida-ne’e diresaun nasionál mak bele halo koordenasaun ho kompañia sira hodi bele hadi’a ponte Beaço.
Entretantu, Ponte Beaço diresaun Viqueque Vila ba postu Uatulari no Uatucarbau ne’ebé kotu iha tinan 2022 ne’e ho nia metru neen (6) no ninia naruk atinje metru hitu (7).
Notísia Relevante: Ponte Beaço kotu difikulta movimentu transpote públiku
Jornalista : Vitorino Lopes da Costa
Editór : Cancio Ximenes
