BOBONARO, 04 fevereiru 2025 (TATOLI)—Diresaun Servisu Munisipál Edukasaun Autoridade Munisípiu Bobonaro sei implementa Programa Merenda Eskolár (PME) tinan 2025 ba loron efetivu 141 iha tempu badak nia laran.
Diretór Servisu Munisipál Edukasaun Munisípiu Bobonaro, Miguel Freitas, hateten tuir loos PME 2025 implementa iha fulan-janeiru maibé la konsege tanba atrazu iha submisaun dadus husi dirijente eskola sira.
Notísia Relevante: Dadus la kompletu, PME 2025 iha Bobonaro seidauk implementa
“Implementasaun Merenda Eskolar 2025 hein de’it nia loron implementasaun, tanba dadus sira-ne’e hatama hotu tiha ona. Ohin loron, Ekipa Jestaun Programa (EJP) sira mai asina ona kontratu, depois hein de’it nia loron atu implementa. Dadus hotu-hotu tama hotu ona ba munisípiu, hein de’it desizaun husi Prezidente Autoridade,” Nia informa ba jornalista sira iha nia kna’ar fatin, tersa ne’e.
Nia konfirma, tersa (04 fevereiru 2025) ohin, Ekipa Jestaun Programa (EJP) selebra kontratu ho Autoridade Munisípiu Bobonaro ho totál orsamentu hamutuk $1,758.783.60.
Antigu Diretór Eskola Ensinu Báziku Sentrál (EBC Sigla Portugués) Gumer ne’e fundamenta, PME 2025 ne’e sei implementa iha eskola Ensinu Báziku no Ensinu Pre-Eskolar hamutuk 179 no husi númeru ne’e eskola privadu hamutuk 16.
Responsável Servisu Munisipál Edukasaun Munisípiu Bobonaro ne’e mos fó hanoin ba EJP sira atu ezekuta programa ne’e tuir manuál ne’ebé distribui ona.
“Aihan ne’ebé atu fó ba ita nia-oan sira tenke bazeia ba kriteria sira-ne’ebé iha. Tuir oráriu dehan ohin ne’e atu han saida ne’e, ninia menu ne’e iha tiha kedas ona. Ne’ebé, atu kompras mós tenke bazeia ba ida-ne’e. Se la tuir menu, ami sei halo ajustamentu ho sira, ami sei buka hatene tanba saida la implementa, pois hotu tiha mak ita sei hadi’a,” nia dehan.
Atu garante Ezekusaun Programa ne’e la’o ho susesu tuir matadalan PME, Miguel Freitas, sekunda Diresaun Servisu Munisipál Edukasaun mós sei involve Diresaun Servisu Munisipál Planeamientu, Ajensiá Fiskalizasaun tanba ekipa monitorizasaun limitádu nune’e labele kobre hotu eskola 179.
Aleinde ne’e, Servisu Munisipál Edukasaun Munisípiu Bobonaro mós sei kria enkontru hodi fó koñesimentu ba Administradór Postu Administrativu neen (6) atu involve funsionáriu Servisu Sosiál suku nian hodi tau-matan no kontrola ba implementasaun programa ne’e.
“Ita haree programa Merenda Eskolár ne’e dalabarak ema kestiona, entaun ha’u hanoin hakarak involve sira. Tanba, ami mesak de’it ne’e labele perkore ka kobre hotu tanba área edukasaun ne’e luan tebe-tebes,” nia hateten.
Antes ne’e, iha tinan 2024 ne’e, Autoridade Munisípiu Bobonaro aloka orsamentu hamutuk $1,531,786.84 hodi ezekuta ba loron efetivu 191. Orsamentu ne’e fahe ba Ensinu Pre-Eskolár $130,519.00 ho totál estudante 2,283 no Ensinu Báziku ho montante hamutuk $1,401,267.84 ba estudante 24,532.
Notísia Relevante: Menu merenda eskolár iha Ermera no Bobonaro ho ikan tilapia
Jornalista : Sérgio da Cruz
Editór : Cancio Ximenes