BOBONARU, 07 fevreiru 2025 (TATOLI)—Diresaun Rekursu Umanu Sekretáriadu Autoridade Munisípiu Bobonaru hatudu katak Funsionáriu Públiku (FP) hamutuk na’in-10 mak tama lista reforma obrigatóriu tanba atinje ona idade 65 no balu liu ona 65.
Funsionáriu hirak ne’e mai husi Diresaun Servisu Munisipál Edukasaun na’in tolu, Agrikultuta na’in rúa, Sekretáriadu Autoridade Munisípiu Bobonaru na’in haat, no Administrasaun Postu Administrativu na’in ida.
Notísia Relevante: PN aprova proposta-lei reforma obrigatóriu ba FP ho idade 65
“Ita-nia funsionáriu permanente rejimé jerál na’in-hitu (7), na’in-rua (2) husi ajente Administrasaun husi servisu Munisipál Agrikultura ho rejimé espesiál ne’e na’in-ida (1), nia destakamentu mai asume kargu administrador postu administrativu Loloto’e. Sira-ne’e mak tama ba reforma obrigatóriu,” Diretór Rekursu Umanu, Sekretáriadu Autoridade Munisípiu Bobonaru, António Romano, informa ba Agência Tatoli iha nia kna’ar fatin, sesta ne’e.
Antigu Aprezentadór Televizaun Timor-Leste (TVTL) ne’e afirma, autoridade munisípiu Bobonaru mos rejista Funsionáriu na’in 49 mak tama iha lista reforma ho pedidu tanba atinje ona idade 60.
Nia sublińa, funsionáriu hirak ne’e kompostu husi Rejimé Jerál na’in-35, ajente administrasaun na’in-lima (5).
“Sira mak halo pedidu husu para atu reforma, ne’e leí fó dalan hela, nune’e para depois idade atinje 60, sira halo pedidu mai kuandu hetan ona aprovasaun bele reforma,” nia hateten.
Diretór Rekursu Umanu ne’e fundamenta lista hirak ne’e sei haruka ba Ministériu Administrasaun Estatál, nune’e bele tau iha planu orsamentu hodi halo rekrutamentu.
“Agora seidauk bele, tanba ita seidauk tau iha planu maibé ita planeia iha 2026 halo rekrutamentu, se dalan nakloke ba rekrutamentu permanenti. Entaun, ne’e di’ak liután, se lae mós ita presiza rekrutamentu ba ajente, nune’e bele susbtitui ema sira-nia vaga ne’e mamuk,” nia dehan.
Nia aprofunda, Diresaun Rekursu Umanu Sekretáriadu Autoridade Munisípiu Bobonaru mós sei halo koordenasaun ho Komisaun Funsaun Públika atu haree fali lista funsionáriu na’in hira mak hetan promosaun grau hahú husi tinan 2019 to’o agora. Tanba, automatikamente funsionáriu ne’ebé promove husi grau aterior ba grau foun, konsidera nia vaga mamuk.
“Ha’u fó ezemplu nia grau atuál ne’e I, nia pasa ba grau II, entaun signifika nia grau I ne’e vaga mamuk. Tanba ne’e, ita haree dadus sira-ne’e ita akumula fali ho dadus reforma obrigatóriu sira-ne’e, nune’e ita bele hatane ita-nia vaga sira mamuk ne’e hira. Depois, ita tau iha planu orsamentu, hodi priense fali vaga sira mamuk ne’e liuhusi prosesu rekrutamentu,” nia hateten.
Tuir dadus tinan 2025, funsionáriu iha Autoridade Munisípiu Bobonaru hamutuk 399 ne’e mai husi funsionáriu Rejimé Jerál Autoridade Munisípiu rasik, funsionáriu rejimé jerál destakamentu asume kargu iha Autoridade Munisípiu na’in-18 no rejimé espesiál na’in-neen (6). Aleinde ne’e ajente Administrasaun 60 inklui mós funsionáriu Programa Nasionál Dezembolvimentu Suku (PNDS).
Notísia Relevante: Reforma obrigatória ba funsionáriu hahú tinan oin
Jornalista : Sérgio da Cruz
Editór : Cancio Ximenes
