DILI, 14 Fevereiru 2025 (TATOLI)—Prezidente klube Boxe El-Matadór hanesan mós treinadór prinsipál Abilio Orlando dos Santos informa, iha fulan-Masrsu ne’e boxista Delio Mouzinho sei aranka ba Canada hodi hala’o treinamentu durante fulan neen (6)-resin atu hasa’e liutan ninia koñesimentu no abilidade.
Notísia Relevante: Treinadór El-Matadór mehi lori boxista timoroan sai kampiaun mundiál
“Ba Delio, ita iha planu ba nia tinan kotuk kedan, maibé fulan oin nia sei ba Canada hodi halo preparasaun iha ne’ebá. Ida-ne’e, ami-nia patrosinadór Caltech mak apoiu másimu tebes ba ami nia boxista,” Abilio hateten ba Agência TATOLI liuhusi programa “Entrevista Eskluziva” iha estúdiu, Faról, sesta ne’e.
Durante Delio hela iha Canada, nia dehan, Delio sei hodi halo treinamentu no tuir kompetisaun sira maibé Caltech mak sei responsabiliza hodi prepara nia hela fatin, han-hemu no nesesidade seluk tan.
“Canada la’ós nasaun kiik, ida-ne’e hatudu katak ita-nia ain sorin tama ona iha Amérika. Orgullu boot ida ba boxista Delio no ba timoroan hotu, bainhira Delio lori ita-nia bandeira ba iha Canada,” nia hateten.
Daudaun ne’e, tuir nia, buat hotu ba Delio prepara ona mak hanesan kontratu ba boxista ne’e no boxista nia billete ba-mai atu aranka ba Canada.
Iha sorin seluk, boxista Delio Mouzinho hateten, nia parte fiar aan nafatin atu ba halo preparassun iha Canada hodi aumenta nia kualidade nu’udár boxista ida.
“Canada nasaun boot, sira iha boxista ne’ebé kualidade barak. Ha’u fiar katak, ha’u bele no sei hatudu rezultadu di’ak durante ha’u ba hela iha ne’ebá,” Delio drhan.
Delio hateten, kondisaun iha Timor-Leste mínimu tebes maibé nia hatudu ona rezultadu, entaun bainhira nia ba halo preparassun iha Canada mak sei hasa’e liutan nia kualidade.
“Iha ita-nia nasaun ho fasilidade mínimu tebes mak ita hatudu ona rezultadu, satán ita ba tan iha Canada. Ida-ne’e, ha’u fiar katak ha’u sei aumenta liutan ha’u-nia kualidade,” nia hateten.
Iha treinadór Abilio nia mehi atu boxista sira sei oferese sintu boxe nian ba Timor-Leste, Delio hateten, la promote maibe iha loron id aka iha biban ruma nia sei lori sintu boxe ne’e mai Timor-Leste.
“Ha’u-nia treinadór iha mehi boot hakarak ami oferese la’ós medalla maibé tenke sintu. Di’ak treinadór, iha loron ida ami sei ofrese ba ita-nia nasaun sintu ida maibé manán iha mundiál,” nia dehan.
Deli onia esperiénsia iha mundu boxe
Iha tinan haat ba kotuk, Delio Anzaqeci Mouzinho, susesu sai segundu lugar iha finál jogu boxe iha Jogu Sudeste Aziátiku (SEA Games, sigla inglés) ba dala-31 iha tinan 2021.
Notísia Relevante: Primeiru-Ministru kontente no kontinua apoia boxista Délio no Deniel
Boxista Delio Anzaqeci Mouzinho manán ho rezultadu KO (knoct out) ho Boxista Hun Kang hosi Kamboja iha ronde daruak.
Nune’e, nia husu ba Governu atu kria kompetisaun barak atu kapasita no hasa’e koñesimentu boxista timoroan sira-nian atu reprezenta Timor-Leste ho prestasaun di’ak iha loorn aban.
Koñese Delio
Delio A. Mouzinho “Nuhachay” moris iha loron 04 fulan-Fevereiru tinan 2000, iha Aldeia Tchai, Suku Lore I, Postu Administrativu Lore, Munisipiu Lautein. Nia nu’udar oan husi inan-aman Manuel Mouzinho no Elisa Mouzinho. Nia hanesan oan da-neen (6) husi maun-alin na’in-hitu (7).
Boxista Nuhachay hahú tama Ensinu Bazica Filiál Tchai iha tinan 2009 too 2014, kontinua tama Ensinu Báziku Central Coro-Asu de Maloru iha tinan 2015 to’o 2017. Iha tinan 2018 to’o 2020, Nuhachay tama ba Ensinu Sekundáriu Jerál Lere Anan Timor iha Lospalos Villa.
Iha tinan 2021, kontinua nia estudu iha ensinu superiór iha Dili Institute of Technology (DIT), foti área Petroleum Engineering, maibé sei iha trimestre II Nuhachay deside hapara nia estudu tanba hakarak tebes promove no dezenvolve nia kareira iha boxe.
Iha tinan 2018, Delio A. Mouzinho “Nuhachay” hahú tama iha vida boxing iha Lospalos, Lereloho no fó treinu husi Coach Elizario Dias Monteiro “Irapere”. Nuhachay tuir kompetisaun dahuluk iha tinan 2019 nunka lakon iha Timor-Leste.
Iha tinan 2020, Boxista ne’e tama ba El-Marador Boxing Club no kontinua treinu to’o selesionadu husi Federasaun Boxing Timor Leste ba tuir Sea Games 2021 iha nasaun Vietname.
Notísia Relevante: “Viva Delio, viva Daniel..!”
Jornalista : Hortencio Sanchez
Editór : Cancio Ximenes
