MJDAK prepara programa importante haat dezenvolve juventude iha 2025
DILI, 19 Fevereiru 2025 (TATOLI)—Diretór Jerál Juventude Ministériu Juventude Desportu Arte no Kultura (MJDAK), David Tomas de Deus, hateten MJDAK prepara ona programa importante haat (4) hodi dezenvolve juventude iha tinan 2025.
Notísia Relevante: MJDAK iha programa prioridade tolu ba tinan 2025
“Programa importante ba juventude ba tinan ida-ne’e, ida mak formasaun kontinuasaun ba membru Parlamentu Foinsa’e, ida mak ita kontinua apoiu fundu ba organizasaun juventude sira hanesan sentru juventude sira hotu iha kada Munisípiu,” Diretór ne’e hateten ba Agência TATOLI iha Salaun Xanana Sport Centre Dili, kuarta ne’e.
Programa seluk mak MJDAK servisu hamutuk ho parte igreja mak Komisaun Nasionál Juventude Katólika Timor-Leste (KNJKTL) ne’ebé sei apoiu sira-nia atividade jornada Nasionál juventude ne’ebé sei hala’o iha munisípiu Bobonaro no programa ida tan mak sei apoiu ba komemorasaun loron nasionál juventude no 12 de Novembru.
Nia esplika, formasaun ba Parlamentu foinsa’e sei realiza iha fulan-abríl ba oin, hodi kapasita joven sira-ne’ebé envolve aan iha Parlamentu foinsa’e.
“Parlamentu foinsa’e, ita halo ona rekrutamentu iha tinan kotuk, tinan agora ne’e ita só fó de’it formasaun ba sira. Entaun, formasaun ba sira ita sei hala’o dala-rua maibé tenke tuir kalendáriu Ministériu Edukasaun nian, tanba sira maiória estudante. Entaun, sira feria eskola mak ita realiza formasaun ba sira, ita haree ona katak formasaun sei realiza iha fulan-Abríl no fulan-Jullu,” nia hateten.
Daudaun ne’e, totál membru Parlamentu foinsa’e hamutuk 142 inklui na’in-rua (2) husi ema ho difisiesia.
Husi núneru ne’ebé iha mai husi Postu Administrativu hotu iha territóriu nasionál no kada postu Administrativu reprezenta ema na’in-rua.
“Ba programa boot haat ne’e ita tau osan hamutuk rihun $400-resin, ida-ne’e ba tinan 2025 nian,” nia dehan.
Notísia Relevante: Orsamentu MJDAK millaun $9,472 aprovadu iha espesialidade
Jornalista : Hortencio Sanchez
Editór : Cancio Ximenes
