DILI, 21 Fevereiru 2025 (TATOLI)-Komisaun A iha Parlamentu Nasionál (PN), trata asuntu Justisa no Konstituisionál, akompaña Governu Konstituisionál dasia hahú halo reforma administrasaun públika.
“Reforma administrasaun públika buat ida boot, mais iha sinál sira ne’ebé hatudu ita komesa la’o daudaun ona ba iha ne’eba, dahuluk mak Governu mai husu ona atu Parlamentu autoriza ba Governu atu lejisla kona-ba lei ba reforma obrigatóriu”, Prezidente Komisaun A, Patrocínio dos Reis Fernandes, hateten ba TATOLI iha resintu PN.
Nia dehan, ida ne’e atu haree oinsá mak hadi’a kualidade administrasaun ba serbidór sira iha administrasaun públika.
Daruak haree dekretu sira hodi fó kompeténsia boot ituan to’o ba iha munisípiu sira, parte ida atu evita uituan burokrásia husi administrasaun públika.
“Ne’e mak pasu sira komesa haree atu hadi’a administrasaun públika, mais kuandu ita temi reforma administrasaun públika ne’e la’ós buat ida ohin ita halo aban atu hotu, ne’e prosesu liga ho atendimentu, rekursu atu hadi’a kondisaun liga ho lejislasaun hanoin buat boot”, nia akresenta.
Prezidente komisaun nia rekomendasaun iha ámbitu reforma ne’e mak sei hato’o hanoin bainhira iha lejislasaun ruma mai iha órgaun lejislativu ne’e.
“Ami nia rekomendasaun ne’e mak ita introdús polítika mai husi Governu mai iha lejislasaun sira, ita debate depois hato’o ita-nia hanoin, introdús ba sira ne’e mak rekomendasaun hanoin sira ne’ebé tau hamutuk ho polítika Governu nia hodi hadi’a buat sira ne’e sai di’ak no polítika públika ne’e ita sempre introdús liuhusi lejislasaun”, nia tenik.
Notísia relevante:https://tatoli.tl/2025/02/04/reforma-obrigatoria-ba-funsionariu-hahu-tinan-oin/
Vise Prezidente Komisaun A no Deputadu bankada opozisaun husi Kmanek Haburas Unidade Timoroan (KHUNTO), Antonio Verdiál de Sousa, hateten nu’udar opozisaun prontu kontribui hanoin di’ak bainhira iha lejislasaun ruma tama mai órgaun lejislativa trata kona-ba reforma administrasaun públika.
Deputadu membru komisaun A, Joaquim dos Santos, dehan tinan 20-resin ona serbisu administrasaun públika presiza halo reforma ba funsaun públiku ba funsionáriu sira, tanba funsionáriu balun idade avansadu, nune’e ita iha ona lei reforma obrigatóriu atu haree.
Deputadu bankada opozisaun husi Frente Revolusionária Timor-Leste Indepedente (Fretilin), ne’e husu atu implementa reforma ne’e hanoin administrasaun públika tenke identifika funsionáriu sira ne’ebé merese atu hetan direitu ba reforma hodi kria kondisaun antesedente nune’e funsionáriu sira ba reforma ne’e fatin labele mamuk.
Entaun, tenke kria kondisaun loké rekrutamentu foun ka funsionáriu foun sira atu prepara pelumenus iha avizu antesedente tinan ida, nune’e ema sira ne’ebé hakarak sai funsionáriu públiku bele mai aplika ba fatin ne’ebé mamuk hodi prense fali ba funsionáriu atuál ne’ebé tama ba reforma ona, nune’e rekrutamentu tenke prepara ba ita-nia joven sira ne’ebé prontu hela atu ba serbi Estadu liuhusi administrasaun públiku.
Tuir dadus husi Komisaun Funsaun Públika (KFP) dadaun ne’e rejista funsionáriu públiku no ajente administrativu na’in 2235 ho idade 65.
Iha 08 Outubru 2024, Parlamentu Nasionál (PN) liuhusi reuniaun plenária aprova proposta-lei númeru 11/VI(1a)-Autorizasaun lejislativa iha mateira fisasaun limite idade ba relasaun serbisu funsionáriu públiku no ajente administrativu ne’ebé iha autorizasaun lejislativa ne’e define idade 65 reforma obrigatóriu.
Ba autorizasaun lejislativa ne’e hetan ona promulgasaun husi Prezidente Repúblika (PR) iha 15 Outubru 2024.
Notísia relevante:https://tatoli.tl/2025/02/04/xanana-orienta-kfp-hadia-sistema-rekursu-umanu-iha-administrasaun-publika/
Jornalista : Nelson de Sousa
Editora : Rita Almeida
