OEKUSI, 25 Fevereiru 2025 (TATOLI) – Sekretáriu Konsellu Kombatente Libertasaun Nasionál (CCLN, sigla portugés) Rejiaun Administrativa Espesiál Oekusi Ambeno (RAEOA), Xisto de Souza, relata, kombatente na’in-146 iha mai husi zona haat submete ona karta kontestasaun kona-ba lista editál ne’ebé públika husi Ministériu Asuntu Kombatente Libertasaun Nasionál (MACLN).
“Fixa kontestasaun sira-ne’e, ami haruka ona ba iha nasionál liuhusi Diresaun Nasionál Pensaun no subvensaun, komposta husi zona haat mak hanesan, Pante Makasar 112, Nítibe 1, Oésilo 28 no zona Pássabe na’in-lima,” Xisto de Souza, dehan iha Oekusi, ohin.
Notísia relevante:CCLN Oé-Cusse seidauk simu reklamasaun husi veteranu no kombatente
Nia hateten, antes ne’e tékniku husi MAKLN halo ona imprensaun ba fixa reklamasaun ka kontestasaun hodi prepara ba veteranu no kombatente ne’ebé la satisfáz ho lista editál ne’e atu mai foti no prenxe ho prazu durante loron 60.
“Agora sira na’in-146 submete ona konstentasaun mai Konsellu Veteranu ne’e hanesan faze primeiru, maibé balun haruka direita ba iha nasionál ami lahatene ne’ebé aban ami sei enkonrtu ho responsavél zona haat ne’e atu sira bele hato’o konstestasaun, ne’e últimu ami loke to’o loron 14 Marsu ba faze segundu nian, sei liuhusi ne’e ami sei la simu ona,”nia afirma.
Tipu konstestasaun husi 146 ne’e, balun 8 a 14 maibé la partisipa iha resisténsia luta nian: “Exemplu ita la haree nia kontribuisaun durante prosesu ukun rasik-aan, maibé iha públikasaun nia naran sai iha 8 a 14, baluM 15 a 19 ho idade menór, ida-ne’e ema konstesta sira”.
“Maibé balun uluk resposável kaixa, maibé ikus mai nia naran sai iha menus três anos, sira ne’ebé tuir nia sai fali 8 a 14, ida-ne’e ema barak la satisfáz mak hato’o reklamasaun mai ne’e,” nia dehan.
Entretantu, totál lista editál ne’ebé aprovada husi Ministériu Asuntu Kombatente Libertasaun Nasionál (MACLN) ba Oekusi hamutuk 3.571, kompostU husi sub-rejiaun Pante Makasar 1.704, sub-rejiaun Oésilo 833, sub-rejiaun Pássabe 357 no sub-rejiaun Nítibe 677.
Notísia relevante:Responsável Rejiaun Haksolok Oé-Cusse husu MAKLN reverifika dadus editál 2009
Jornalista: Abílio Elo Nini
Editór: Florencio Miranda Ximenes
