OEKUSI, 28 Fevereiru 2025 (TATOLI) –Autoridade Rejiaun Administrativa Espesiál Oekusi Ambeno (RAEOA), liuhusi Sekretáriu Rejionál ba Asuntu Saúde, renova kontratu ho Institutu Nasionál Farmásia Produtu Medikamentu (INFPM) ho valór $467,204.59 hodi kontinua fornese ai-moruk ba fasilidade saúde Oekusi.
Sekretáriu Rejionál ba Asuntu Saúde, Luís de Jesus Neno, informa, kontratu ne’e vale ba tinan ida nian hahú husi Janeiru to’o 31 Dezembru 2025, atu fornese ai-moruk inklui fornese ekipamentu médiku.
“Iha semana kotuk, ami renova ona kontratu atu kontinua distribui ai-moruk hodi atende ita-nia komunidade iha Oekusi tanba kontratu antes remata ona iha loron 31 Dezembru 2024,” Luís de Jesus Neno, dehan iha Oekusi, ohin.
Notísia relevante:Autoridade RAEOA planu renova kontratu ho INFPM hodi kontinua fornese ai-moruk
Valór kontratu ba renovasaun ne’e iha diferente uitoan tanba iha tinan kotuk 2024 prevee $511,000.00, maibé tinan ne’e tuun uitoan ba $467,204.59.
“Iha mós orsamentu atu kompra medikamentu emerjénsia hamutuk rihun $15 tanba bainhira stock-out urjente ita hakarak ka lakohi tenke sosa ai-moruk, entaun ita tenke prevee kedas nia orsamentu,” nia realsa.
Ai-moruk sira-ne’ebé atu sosa iha tinan 2025 ne’e, hamutuk item 365 hodi halo tratamentu iha Oekusi, nune’e espera katak ho orsamentu uitoan maibé jere ho didi’ak, nune’e komunidade sira bele hetan tratamentu seguru no justu.
Iha fatin seluk, Responsavél Farmásia Servisu Saúde Rejionál Oekusi, Maria Lizeti da Cunha, hateten ai-moruk ne’ebé kompra iha 2024 daudaun sei iha armajén, maibé falta 3%, nune’e kompra iha 2025 ne’e.
“Atu kompra ai-moruk 2025 nian, ami submete ona notifikasaun, nune’e daudaun sei armazena hela ne’e stock-out 2024 sei utiliza hela, kona-ba stock-out ein-jerál ita iha 3% maibé ida-ne’e seidauk tama iha kategória dehan stock out tanba iha indikadór ne’e karik tenki liuhusi 10%, maibé 3% ne’e ita sempre submete pedidu ba INFPM atu atende ba item ne’ebé presiza,” nia dehan.
Entretantu, totál pesoál saúde iha Oekusi hamutuk 427 mak destaka ba servisu saúde rejionál, Ospitál Referál Oekusi, sentru saúde lima no postu saúde 20 iha territóriu Oekusi no fatin tratamentu suku iha fatin izoladu 11, inklui pontu entrada fronteira Sakato no aeroportu internasionál Rota do Sândallo.
Notísia relevante:Autoridade RAEOA kontrata INFPM ho kustu rihun $511 atu fornese ai-moruk
Jornalista: Abílio Elo Nini
Editór: Florencio Miranda Ximenes
