Loron Nasionál Veteranu, fundadór FRETILIN hato’o reflesaun ba kauza komún
DILI, 03 Marsu 2025 (TATOLI)—Fundadór FRETILIN no fundadór Repúblika Demokrátika Timor-Leste (RDTL), Marí Alkatiri, hatete hateten loron 03 Marsu 2025 nu’udár loron Veteranu Libertasaun Nasionál, tan ne’e ema hotu-hotu tenke halo reflesaun hodi memoriza luta libertasaun nasionál iha pasadu.
“Loron 03 Marsu 2025, mai ita hotu hahú ho idak-idak nia kbiit rasik, atu halo reflesaun ida kle’an ba ita-nia luta durante tempu naruk, ita-nia peregrinasaun, ita-nia mehi, tanba ita-nia kauza ida-ne’ebé ita hotu hakuak ho sakrifísiu oin-oin to’o fó aan ba mate,” Marí dehan kestaun ne’e iha nia Gabinete ex Titulár, Faról, Dili, segunda ne’e, relasiona ho komemorasaun Loron Nasionál Veteranu ba dala VIII.
Ex Primeru-Ministru tenik hahú agora hamutuk lori misaun no vizaun rai ida-ne’e ba futuru ne’ebé di’ak, liuliu halo nafatin hanesan uluk nakonu ho sentidu misaun no vizaun ba kauza ida atu kore povu husi mukit no ki’ak.
Notísia relevante: Loron veteranu sei hasa’e de’it Bandeira
“Ba ida-ne’e ita hotu tenke simu responsabilidade idak-idak nian, koletivu nian ba jornada uluk nian no ba jornada ne’ebé atu hahú agora,” Marí informa.
Nia haktuir katak tinan 1981 ne’e Primeira Konferénsia FRETILIN nian no tau 03 Marsu 1983 nu’udár Loron Nasionál Veteranu tanba hatene ona veteranu iha dezde tinan 1974, 1975, la’ós sura de’it veteranu ne’ebé husi 1981 ne’e.
Jornalista: Osória Marques
Editór: Xisto Freitas da Piedade
