OEKUSI, 03 Marsu 2025 (TATOLI)–Prezidente Repúblika (PR), José Ramos Horta, hateten Loron Nasionál Veteranu, nu’udár loron reflesaun ba povu Timor-Leste, tan ne’e nia apela ba ema hotu atu fó onra, hakruuk hodi reza ba eroi sira-ne’ebé mate, fakar sira-nia raan iha tempu luta ba ukun rasik-aan.
“Ita hakruuk, ha’u mós hakruuk ba veteranu sira-hotu no reza ba sira, hahú husi atuál Primeiru-Ministru Xanana Gusmão ho sira seluk,” Horta hato’o apelu ne’e bainhira apoia nesesidade bázika ba kbi’it laek sira iha Oekusi, segunda ne’e.
Notísia relevante:Loron Nasionál Veteranu, “Reflete pasajen, relembra prezente no projeta iha futuru”
Tuir nia katak lidér hanesan Nicolau Lobato no Xanana, idak-idak iha nia fatin ho nia istória rasik, maibé hakruuk mós Taur Matan Ruak, Lere, Falur, Sabika, Coliati no sira seluk ne’ebé nia la temi naran.
Aleinde ne’e, Horta informa, hakruuk mós ba joven rede klandestina 12 Novembru, tanba loron 12 Novembru 1991, joven sira-nia partisipasaun importante tebes, tanba kontribui manán luta ne’e.
“Ita mós labele hanoin de’it ba vateranu sira kaer kilat ne’e. Sira-ne’ebé kaer kilat la barak tanba barak mak mate hotu. Sira eroi maibé rede klandestina iha rai-laran no rai-li’ur hanesan Bali, Jakarta no Surabaya, ne’e mós ita tenke hakruuk no reza ba sira,” nia hakotu.
Notísia relevante:Loron Nasionál Veteranu, fundadór FRETILIN hato’o reflesaun ba kauza komún
Entretantu, Loron Nasionál Veternu, 03 Marsu 1981, definidu ona iha Lei nú. 3/ 2016. Loron istóriku ne’e maihusi konferénsia nasionál FRETILIN iha Maubai-Vikeke, iha loron 3 fulan-Marsu 1983, orientasaun hosi membru Komité Sentrál FRETILIN (CCF-sigla portugés) sobrevivente na’in-tolu, Kay Rala Xanana Gusmão, Ma’huno Bulerek Karathayano no Adjuntu Tchai.
Konfresista sira hili membru CCF nian na’in-sia foun hodi foti dezisaun importante lubuk ida, hodi organiza ka reorganiza luta nasionál iha teritóriu tomak.
Jornalista: Abílio Elo Nini
Editór: Xisto Freitas da Piedade
