OEKUSI, 04 Marsu 2025 (TATOLI) – Prezidente Repúblika, José Ramos Horta, segunda ohin, apoia nesesidade bázika ba Ema ho Defisiénsia (EHD) 23 no kbiit-la’ek hamutuk 200 iha sub-rejiaun Pante Makasar Rejiaun Administrativa Espesiál Oekusi Ambeno (RAEOA).
Xefe Estadu ne’e informa, asaun karridade ne’e mai husi orsamentu Prezidente Repúblika no balun hetan apoia husi parseriu internasionál husi nasaun Japaun.
Notísia relevante:PR Horta husu timoroan hakruuk hodi reza ba eroi sira
“Ha’u mai ferias iha ne’e mai fahe mós sasán, balun husi orsamentu Prezidente Repúblika nian rasik hanesan foos ho mina ba vulneravél sira, maibé lori mós hena balun mai husi Japaun husi fundasaun ida naran Nipont Fundations, nia na’in ka Prezidente mak Yosei Sasakawa, nia ema koñesidu iha Japaun no mundu nu’udar ema riku bo’ot ida, ha’u koñese nia tinan 30 ona, ha’u mak husu ajuda ba sira atu apoia Prezidente Repúblika nia programa,” Xefe Estadu hateten ba jornalsita sira iha salaun Dominikana Oekusi, ohin.
Xefe Estadu informa mós katak iha tempu badak parsériu balun husi nasaun Honkong nu’udar amigu sei mai atu oferese tan ai-han vitamina ba labarik sira atu kontribui ba sira-nia nutrisaun lori mós ho sasán seluk, hanesan komputadór no laptop ne’e halo parte programa Prezidente Repúblika.
“Ohin, ha’u mai Oekusi hanesan pasiar de’it aproveita mós entrega ai-han uitoan ba apa-ama sira ho defisiénsia tanba sira iha difikuldade tenke buka ajuda, maibé la signifika Governu la fó ajuda, Governu nia sistema oin seluk, ne’e liuhusi solidariedade sosiál ba defisiénte sira hetan apoia sira-ne’ebé tama iha lista kada fulan tolu sira simu apoia,” nia dehan.
Purtantu, nia dehan, ita-nia Estadu la’os Governu de’it, maibé Estadu tomak iha orsamentu liuhusi Ministériu Solidariedade Sosiál no Inkluzaun apoia ema vulneravél iha fatin barak apoia terseira idade no veteranu sira.
“Ita-nia orsamentu ba problema sosiál bo’ot tebes todan ba Estadu, ita sukat bele to’o milaun $400 kada tinan, ne’e han osan bo’ot, entaun nu’udar Prezidente liuhusi ha’u-nia rede internasiomál tenta ajuda uitoan, buat ne’ebé Prezidente halo uituan kompara ho buat ne’ebé Governu halo, maibé ita buka tan ne’e malu ho Governu atu ki’ak sira bele hetan benefisíu uitoan, tan ne’e mak ha’u mai to’o Oekusi, atu pasiar uitoan tanba ha’u gosta Oekusi,” nia dehan.
Iha fatin hanesan, José Corbafo, nu’udar Ema ho Defisiénsia husi suku Lalisuk sente orgullu tanba nesesidade bázika ne’e bele sustenta nesesidade família.
“Ami sente kontente, ita haree rasik ho matan, ohin Prezidente fó hela ami foos mina, faru no sapatu mai ami, ne’ebé ida-ne’e ami sente orgullu maski apoia ne’ebé ki’ik, maibé ida-ne’e sufisiénte mai ami atu uza,” nia agradese.
Entretantu, tuir ajenda iha loron 04 Marsu ne’e, Prezidente Repúblika sei hala’o vizita ba ema kbi’it no Ema ho Defisiénsia (EhD) iha Oémolo suku Lifau, no iha loron kuarta, Xefe Estadu sei partisipa misa sinzas iha Igreja Parókia Numbei Oekusi.
Notísia relevante:PR Horta ho emosaun asiste serimónia selebrasaun Senhor de Morto iha Oé-Cusse
Jornalista: Abílio Elo Nini
Editór: Florencio Miranda Ximenes
