OEKUSI, 05 Marsu 2025 (TATOLI) –Amu Vigário Forano Parókia Numbei, Florindo de Jesus, hateten, kuarta-feira sinzas nu’udar dalan ba selebrasaun festa paskua, nune’e kuarezma tempu sarani sira hotu atu halo reflesaun karidade no abstinénsia liuhusi períodu jejún no orasaun.
Tuir Padre Florindo, loron kuarta-feira sinzas, sarani hotu simu ahi-kudesan katak ita husi rai sei fila ba rai, maibé Maromak mak fó iis ba ema idak-idak tanba ne’e ahi-kudesan ne’e konvida ema hotu atu hatene serbí, rona, ko’alia no hatene haku’ak ema hotu.
Notísia relevante:Tempu kuaresma, sarani katólika presiza halo reflesaun ba moris
Nune’e mós ba tempu kuarezma nu’udar tempu ida lori sarani sira fila ba Maromak liuhusi atividade halo orasaun jejún no abstinénsia.
“Ita hahú loron ohin, kuarta-feira sinzas, nu’udar dalan atu loke odamatan ba ita, prepara ita nia-aan, ba selebrasaun festa paskua ho fuan di’ak, moos no domin ba Jesus Kristo, uma kreda husu ita prátika didi’ak, saida mak rekomenda mai ita iha evangelu ohin, buat tolu husu mai ita nu’udar sarani Katolika atu halo liuliu iha tempu kuarezma, primeiru ezmola, segundu orasaun no terseiru jejún,” dehan iha omília misa sinzas iha igreja tuan Oekusi, ohin.
Tuir padre katak, sentidu sinzas ba sarani fiar na’in mak, ahi-kudesan ne’ebé kose iha rentos mak hatudu sinál katak, iha vontade hodi la’o iha dalan loos ne’ebé Jesus hanorin ona mundu, katak hakribi salan ho loloos no husu Maromak nia perdaun ba ita-nia salan sira.
Aleinde ne’e, sinzas mak sinál hatudu katak: “Ita mai husi rai rahun, loron ida sei fila ba rai, aumezmu tempu hanesan mós simu krúz hodi la’o tuir Jesus, husi to’os Oliveira ba to’o foho Kalváriu, tan ne’e mak hahú daudaun tama ba kuarezma ne’e hodi hadeer-aan, jejún hamutuk ho Jesus durante loron 40 iha rai fuik maran, no uma-kreda bandu sarani sira atu halo festa durante tempu kuarezma”.
“Sinzas ne’ebé ohin kose iha ita idak-idak nia rentos, bele hanorin ita hatene haraik-an, hodi kumpre didi’ak ita-nia obrigasaun nu’udar sarani iha tempu kuarezma, ida-ne’e mak ita prepara-an didi’ak hodi hein ba selebra festa paskua ho fuan moos no laran moos,”Amu ne’e apela.
Padre ne’e hateten ksolok loloos ne’e mak bainhira la’o hamutuk ho Jesus, hahú husi ohin ba to’o paskua iha foho Kalváriu tutun, dalan atu ba to’o paskua ne’e, liuhusi kuarezma ho kondisaun tolu ne’ebé aprezenta ona mak, ezmola, orasaun no jejún.
“Ita buka prátika didi’ak hahalok tolu ne’e durante tempu kuarezma nia laran, nune’e de’it mak ita sei halo peregrinasaun ho esperánsa hodi la’o ba to’o selebra Kristu-nia terus, mate no moris hias iha loron paskua,” nia fó hanoin.
Saserdote ne’e esplika, ezmola katak iha tempu kuarezma, uma-kreda husu ema hotu atu prátika ezmola husu atu hatene fahe buat ne’ebé ita iha ho ema seluk ita uza uitoan ne’ebé ita iha, ita fahe ba ema seluk, liuliu ba ema ki’ak sira-ne’ebé laiha buat ida.
Kona-ba orasaun, durante tempu kuarezmu, uma-kreda husu ita atu rona nafatin Maromak nia liafuan, hodi halo medidasaun, halo orasaun no halo reflesaun, nune’e ita bele halo arependimentu hodi husu Maromak nia perdaun iha tempu kuarezma ne’e nia laran.
Terseiru mak jejún, atu buka la sai hanesan ema laran makerek sira-ne’ebé, hateten iha evangelu sira katak, “Imi buka atu labele sai hanesan ema laran makerek sira, halo buat hotu la’ós ema atu haree, maibé ita halo tanba fiar, ita halo atu hetan Maromak nia grasa, ita halo la’ós atu buka oin, la’ós sai provokatór, maibé ita halo tuir profeta Joel, ne’ebé hateten iha primeira-litura katak, ‘fila imi-nia laran ba Maromak hodi hadeer-an, hodi tanis no halerik iha tempu kuarezmu ne’e, atu hetan grasa iha tempu paskua’.
Iha biban ne’e, Armindo dos Reis Santos, nu’udar sarani, konsidera loron kuarezma nu’udar loron silénsia ba sarani Katólika, hodi halo reflesaun kona-ba komportamentu umanu molok simu festa paskua nian.
“Ita hanesan sarani, fiar-na’in Katólika, ita tenke kumpre regra sira ne’ebé igreja fó sai ona, ita koko la’o tuir, katak ne’e tama ona loron kuarezma, presiza hamenus buat sira-ne’ebé ita prátika iha moris loron-loron hakmatek laiha barullu ka halo festa tun-sa’e, ida-ne’e la’os igreja mak obriga maibé hakerek nanís ona dezde uluk to’o jerasaun ita-nian tenke banati tuir,” nia
Notísia relevante:Kuarezma hanesan konvite ida lori ema rekonsilia ho Maromak
Jornalista: Abílio Elo Nini
Editor: Florencio Miranda Ximenes
