OEKUSI, 06 Marsu 2025 (TATOLI) –Diresaun Patrimóniu Estadu Rejiaun Administrativa Espesiál Oekusi Ambeno (RAEOA), husi Janeiru to’o Dezembru tinan 2025, konsege arrekada reseita ba kofre Estadu hamutuk $86,163.25 liuhusi leilaun veíkulu Estadu.
“Reseita ne’ebé ita rekolla iha 2024 kontinuasaun husi 2023, liuliu ba leilaun veikulu Estadu hanesan motorizada no karreta hamutuk rihun $86,163.25,” relata Diretór Diresaun Patrimóniu Estadu Oekusi, Gonzalo dos Remedios Eko, ba TATOLI,I.P, ohin.
Notísia relevante:Autoridade RAEOA inaugura edifísiu Patrimóniu Estadu iha Pante Makasar
Prosesu leilaun ne’e iha tipu rua hanesan internál mak prioridade ba funsionáriu sira no públiku hodi fó oportunidade ba sidadaun hotu atu partisipa hodi asesu konkursu públiku ne’e.
Kona-ba leilaun públiku iha karreta 14, maibé 11 de’it mak ema foti no motorizada 10 maibé 6 mak konsege ema hola, ba internu iha motorizada 195 ema foti mak 183.
Daudaun ne’e, ekipa kontinua rekolla iha Sekretáriu Rejionál sira no diresaun hotu, nune’e bele halo leilaun iha tinan 2025 ne’e.
“Ekipa rekolla hela, depois mak ita sei haree kondisaun viatura sira hotu iha kada Sekretáriu no Diresaun hotu, balun kuandu kondisaun di’ak, bele kontinua halo manutensaun, maibé ita sei haree husi kustu manutensaun, kuandu valór aas liu, bele tama ba leilaun tanba ita mós presiza redus kustu ba manutensaun tanba tinan ne’e ita la sosa foun,” nia hateten.
Entretantu, totál viatura Estadu daudaun rejista iha Oekusi ba motorizada 100-resin no karreta hamutuk 86.
Notísia relevante:KFP-PDHJ deteta funsionáriu balun iha RAEOA manipula lista prezensa
Jornalista: Abílio Elo Nini
Editór: Florencio Miranda Ximenes
