OEKUSI, 07 Marsu 2025 (TATOLI) – Autoridade lokál sira iha sub-rejiaun Nítibe, Rejiaun Administrativa Espesiál Oekusi Ambeno (RAEOA), espera kompañia sira-ne’ebé halo reabilitasaun estrada rurál tolu iha parte Nítibe bele aselera, nune’e fasilita komunidade sira asesu ho di’ak.
Projetu reabilitasaun estrada tolu ne’ebé implementa iha sub-rejiaun Nítibe mak hanesan iha suku Taiboko, sub-rejiaun Pante Makasar ezekuta husi kompañia Raynaldo’s Unipesoál Lda, ne’ebé reabilita kilometru 14,35 hahú husi Oétako suku Taiboko to’o Huekolen suku Lela-Ufe sub-rejiaun Nítibe ho valór kontratu $393,995.01.
Notísia relevante:PM Xanana rekomenda ba empreza kontinua fui semente ba estrada Taibako-Usitaku no Lelaufe
Daruak, projetu reabilitasaun estrada kilometru 6,7, husi Fatukenfua suku Usitako liga ba Lamasin suku Bene-Ufe sub-rejiaun Nítibe, ezekuta husi kompaña Colneno Unipesoál Lda ho valór kontratu $385,119.17.
Datoluk, reabilitasaun husi Oélet suku Usitaku to’o Oélniti suku Lela-Ufe ho distánsia kilometru22,7 ne’ebé ezekuta husi kompañia Lifau Indah Unipesoál Lda ho valór kontratu $1,381,857.50.
“Ha’u-nia observasaun katak, tinan ne’e ami agradese ba Governu tanba halo reabilitasaun estrada rurál suku tolu iha parte Nítibe nian, mezmu seidauk finaliza maibé ita agradese tanba tinan ne’e lahanesan ona ho tinan sira liuba, kuandu tempu udan hanesan ne’e karreta ho motor labele ultrapasa ho di’ak, ne’ebé ami espera kompañia bele aselera,” Jestór sub-rejiaun Nítibe, Agustinho Afulit, ba jornalista sira iha Lamasin, foin lalais ne’e.
Nu’udar autoridade lokál, fiar katak iha fulan-Abríl ba oin kompañia bele hatutan halo di’ak liutan, entaun tinan oin to’o tempu udan hanesan ne’e bele finaliza oan.
“Ami agradese ba kompañia tolu ne’ebé halo reabilitasaun ba estrada rurál sira sira iha Nítibe, ami mós simu ona informasaun husi Primeiru-Ministru foin daudaun mai vizita iha Lamasin, no Prezidente Autoridade, katak reabilitasaun ne’e ho fazeadamente depois sei nahe tán simenti,” nia katak.
Iha fatin seluk, Xefe suku Bene-Ufe, Marcos Meni, hateten reabilitasaun estrada iha Lamasin daudaun ne’e to’o ona Fatukenfua, maibé kompañia seidauk tanba hein hela seremónia kulturál.
“Ha’u agradese tanba estrada sira-ne’e foin dahuluk halo reabilitasaun no maske iha situasaun udan, maibé husi Autoridade RAEOA no Primeiru-Ministru konsege vizita ona suku Bene-Ufe no suku Usitaku,” nia orgullu.
Notísia relevante:Estrada kotu, difikulta komunidade Lela-Ufe lori produtu bá merkadu no asesu postu saúde
Jornalista: Abílio Elo Nini
Editor: Florencio Miranda Ximenes
