LAUTEIN, 07 Marsu 2025 (TATOLI)–Membru Konsellu Veteranu iha suku Bauro, postu administrativu Lospalos, munisípiu Lautein, Armindo Nunes, informa lista validasaun veteranu rejistadu 2009 husi 15 a 19, 3 a 7 no martir sira, iha Suku Bauro hamutuk ema na’in-381 mak fó sai husi lista editál husi nasionál.
Notísia Relevante: MAKLN prepara ekipa re-verifika dadus veteranu rejistadu iha 2009
“Lista ne’ebé fó sai ona husi nasionál mai iha munisípiu iha ha’u-nia suku Bauro hamutuk ema na’in-381 mak pasa ba títulu kombatente libertasaun, Maibé, ami sei rekolla nafatin sira-ne’ebé hatama sira-nia lista kontestasaun bainhira la aseita ho tinan ka grau ka eskalaun ne’ebé fó sai ona,” Armindo Nunes hateten ba Agência TATOLI iha Bauro, tersa (03 Marsu 2025) ne’e.
Nia dehan, lisa veteranu sira-nian fó sai iha loron 14 fulan-Fevereiru no sei finaliza iha loron 14 fulan-Marsu hodi kompleta loron 60 ba sira ne’ebé halo reklamasaun.
“Agora daudaun ami simu reklamante lubuk ida ona, Iha suku ida Bauro ne’e, ha’u mak inklui iha ekipa verifikasaun ida katak prosesu balun seidauk kompletu tanba sira balun nia naran haruka husi nasionál mai balu 8 a 14, balu 3 a 7 no balu 15 a 19, maibé sira ne’ebé la aseita ho tinan ne’e bele halo reklamasaun ka kontestasaun,” nia dehan.
Entretantu, tuir dadus veteranu rejistadu 2009 iha teritoriu nasionál hamutuk ema na’in-124.680.
Liuhosi konteúdu ne ebé mensiona iha Estatutu Kombatente Libertasaun Nasional, lei númeru 3/2006, no artigu 13 hateten Registo da Qualidade de Combatente da Libertação Nacional sei kontinua hala’o validasaun rejistu ba períodu daruak nian ba rekoñesimentu Kombatente hanesan Libertasaun Nasionál ne’ebé rejista ha tinan 2009.
Notísia Relevante: Provizóriu, MAKLN rejista reklamasaun no kontestasaun rihun 11-resin
Jornalista : Hortencio Sanchez
Editór : Cancio Ximenes
