BOBONARU, 10 Marsu 2025 (TATOLI)—Empreza Internasionál PT Hutama Karya, akompañadu husi tékniku Ministériu Obra Públika no Ajensía Dezenvolvimentu Nasionál (AND), segunda ne’e, hahú halo teste nahe alkatraun ne’ebé atu utiliza ba iha projetu reablitasaun Estrada Urbana Maliana villa pakote II.
Notísia Relevante: Governu hatuur fatuk dahuluk ba projetu reabilitasaun estrada urbana Maliana pakote I
Team Leader Consultante Wan Husin Associates JV Linier, Mohamad Azham Bin Mamek, konfirma faze dahuluk ba teste nahe alkatraun ne’e ninia meta ba distánsia metru 100 hahú husi área Sentru Abastesimentu Aitula Fuel oinsá atu haree alkatraun nia kualidade.
“Aban ita sei halo teste. Ita sei halo teste nahe alkatraun ba estrada uza Prime Coat to’o ba Ceanish 200 no ita para uitoan ba estrada faixa (jalur) liman karuk de’it. Aban, dalan ne’e seguru ona mak ita sei ba halo teste ba estrada faixa liman kuana nian. Entaun, parte liman kuana ba públiku ka populasaun no ita taka dalan sorin. Iha loron rua ka tolu, ita halo loos tiha dalan foun mak ita sei hahú fui alkatraun iha parte liman kuana nian no ita sei halo Step 1, Step 2, Step 3, Step 4, Stape 5, Step 6, Step 7, Sep 8. Tanba ita hanoin ne’e populasaun no transporte públiku uza faixa (jalur) parte liman karuk no loos,” nia informa ba Agência Tatoli, segunda ne’e.
Sorin seluk, Koordenadór Infrastrutrura Ministériu Obra Públika Munisípiu Bobonaru, Fernando de Fátima, relata progresu fiziku implementasaun obra ne’e la’o atrazu tanba foin atinje 17%.
“Ninia progresu la’o tarde uitoan, tanba iha fallansu ba buat balun entre kompañia. Momentu mai ne’e, sira-nia ekipamentu mós limitadu tebes, maibé depois ami halo koordenasaun ho Konsultan no kontratór sira fó hatene katak agora ekipamentu ne’e iha dalan mai ona. Ne’ebé agora ita sei teste alkatyraun ho nia distánsia metru 100. Kuandu ida-ne’e tama, ita sei la’o ho ida-ne’e,” nia dehan.
Enkuantu obra ne’e sei gasta orsamentu millaun $21-resin ho durasaun kontratu tinan ida (1) fulan neen (6).
Notísia Relevante: PAM Bobonaro husu empreza HK-BMS ezekuta projetu estrada Maliana ho kualidade
Jornalista : Sergio da Cruz
Editór : Cancio Ximenes
