OEKUSI, 11 Marsu 2025 (TATOLI) – Projetu gabiaun metru 335 ne’ebé ezekuta husi kompañia Bobometo Unipesoál Lda iha bairru Paut aldeia Oébaha suku Bobometo sub-rejiaun Oésilo, daudaun ne’e nia progresu servisu fíziku atinje ona 12%.
Diretór Diresaun Rejionál Infraestrutura (DRI), Remigío Nuno Sila, informa projetu konstrusuan gabiun ne’e importante tanba sai hanesan materiál atu harii ponte iha mota Oébaha.
Notísia relevante:Rogério Lobato orienta DRI prepara BoQ hodi konstrui ponte iha Oébaha
Foto TATOLI,I.P/Abílio Elo Nini
“Ponte Oébaha seidauk ezekuta, maibé kompañia hahú uluk morru satan rai ka halo gabiaun iha mota ninin agora atinje ona 12%, hodi hein empreza order tan husi Jakarta-Indonézia, entaun mekanizmu ida mak tenke halo uluk gabiun, nune’e proteje komunidade sira iha fatin ne’e,” nia dehan ba jornalista sira iha Oekusi, ohin.
Diresaun Obra Públika espera katak iha fulan-Marsu 2025 ne’e, kompañia bele order ona materiál sira tanba koordenasaun kompañia ho parte produsaun materiál durante ne’e la’o.
Notísia relevante:Empreza Bobometo ladauk konstrui Ponte Oébaha
“Husi diresaun obra públika hein de’it materiál sira mai to’o ne’e, ita sei halo verifikasaun aprova mak foin bele ezekuta ponte ne’e,” nia informa.
Enjeñeiru husi Empreza Bobometo Unipesoál Lda, Juliano Quefi, informa progresu konstrusaun referidu atinje ona 12,28%, item servisu balun la’o ona no garante iha sei finaliza iha fulan-Marsu ne’e.
“Agora kona-ba materiál sira atu konstrui ponte daudaun sei prodús hela iha Indonézia, ne’ebé sei to’o Oekusi iha fulan-Abril 2025 ne’e, agora ami hahú uluk mak gabiaun no tuir planu finaliza iha fulan-Marsu ne’e”, nia promete.
Entretantu, kontrusaun ponte Oébaha ho morru protesaun ne’e ezekuta husi kompañia Bobometo Unipesoál Lda ho valór kontratu $841,871.06 Autoridade RAEOA aloka husi Orsamentu Jerál Estadu (OJE) 2025 ho durasaun servisu hahú iha Dezembru 2024 sei termina iha fulan Maiu 2025.
Notísia relevante:Komunidade Oébaha husu Rogério Lobato kumpre promesa harii ponte iha Paut
Jornalista: Abílio Elo Nini
Editór: Florencio Miranda Ximenes
