MI husu PNTL Bobonaru tane didi’ak povu nia konfiansa
BOBONARU, 13 Marsu 2025 (TATOLI)—Ministériu Interiór (MI), Francisco da Costa Guterres, akompanadu husi Segundu Komandante Jerál Polisía Nasionál Timor-Leste (PNTL), Komisáriu Pedro Bello, kinta ne’e, halo vizita servisu ba Kuartél Komandu Munisípiu Polisía Bobonaru, oinsá atu rona preokupasaun no orientasaun servisu ba oin ho di’ak liután.
Notísia Relevante: MI seidauk bele hasai despaxu ba rekrutamentu membru foun PNTL
Ministru Interiór, Francisco da Costa Guterres, hateten iha tinan kotuk PNTL munisípiu Bobonaru presta ona servisu ho di’ak no susesu, tanba iha eventu boot hirak ne’ebé liu situasaun serguransa la’o kontroladu hodi lori pás ba komunidade.
Nia dehan, dedikasuan membru PNTL sira-nian ne’e importante tebes hodi hatuur hakmatek iha selebrasaun eventu boot sira-ne’ebé la’o ho di’ak no hakmatek.
“Ita-boot sira-nia servisu ne’e hasa’e konfiansa povu nian, hanesan ha’u ko’alia beibeik, povu ne’e tau hela fiar, konfiansa ba imi-nia kbaas, imi hala’o imi-nia servisu durante ne’e la’o ho di’ak. Tanba ne’e, mak konfiansa ne’ebé povu tula iha imi-nia kbaas, imi tenke hala’o ho di’ak no kuidadu no nakonu ho responsablidade, tenke tane didi’ak konfiansa ida-ne’e,” Nia hateten iha enkontru ne’ebé hala’o iha Kuartél Komandu PNTL Munisípiu Bobonaru.
Ministru ne’e husu ba membru PNTL sira atu kontinua servisu ho dixiplina no kumpre lei no orden, ierarkia Komandu PNTL hodi lori hakmatek ba povu munisípiu Bobonaru.
“Sira hatene katak só ita-boot sira mak bele garante sira-nia seguransa iha fatin ne’ebé de’it, nafatin servisu ho didi’ak no responsablidade. Hanesan membru Polisía, ita-boot sira servisu ho regra no regulamentu ne’ebé regulariza ita-boot sira morís, hahalok no lala’ok,” nia hateten.
Governante ne’e hato’o agradesimentu ba superiór no membru PNTL Bobonaru ne’ebé durante tinan 2024 ne’e presta ona servisu ho responsablidade, hodi garante seguransa iha eventu sira hanesan 28 novembru, finadu, selebrasaun Natál no tinan foun liuliu fó susesu ba iha eventu prinsipál vizita sua Santidade Papa Francisco mai Timor-Leste.
Nia hatutan, Servisu hirak ne’ebé PNTL presta ne’e hatudu ema hotu mundu nia fiar ba Timor-Leste.
“Vizita ne’e hanesan eventu kulminante ida mai Timor-Leste tanba vizita ne’e tau Timor-Leste iha mundu, ema barak mak tau-matan mai ita. Vizita ne’e mós entermus de seguransa lori mos risku ne’ebé boot tebes mai ita-nia rain. Maibé, ho ita-boot sira-nia servisu, vizita la’o ho susesu ne’ebé hatudu ba mundu Timor-Leste país ida-ne’ebé ho nia kultura, relijiaun no país ida-ne’ebé nakonu ho domin, pás no establidade. Mundu admira tanba ita mobiliza sarani sira Ajuda Igreja Katólika, ajuda komunidade, líder lokál, mobiliza sarani sira ba to’o Dili hodi tuir misa ne’ebé la’o ho susesu,” nia dehan.
Enkuantu, Komandu Munisípiu Polísia Bobonaru iha eskuadra neen (6) mak hanesan Maliana, Cailaco, Balibo, Atabae, Balibo no Loloto’e inklui postu Batugade.
Notísia Relevante: Janeiru-agostu 2024, PNTL Bobonaro rejista kazu 222 iha MP
Jornalista : Sérgio da Cruz
Editór : Cancio Ximenes
