DILI, 13 Marsu 2025 (TATOLI)–Primeiru-Ministru (PM), Kay Rala Xanana Gusmão, kinta ne’e, hasoru malu ho Prezidente Repúblika José Ramos Horta hodi relata progresu preparativu Governu nian ne’ebé Timor-Leste sei sai uman-na’in ba eventu internasionál lubuk ida-ne’ebé sei akontese tinan ne’e, iha Palásiu Prezidensiál Bairru Pite, Dili.
Notísia Relevante: Nasaun membru kompromete apoia TL hodi susesu sai uma-na’in ba Jogu CPLP 2025
“Ha’u informa de’it ba Prezidente katak preparasaun kada ministériu sira hotu atu simu bainaka sira hotu sei mai, atu partisipa iha atividade sira hanesan, g7+ nian, atividade Lusufonia nian, jogu CPLP nian no vizita sira hanesan Primeiru-Ministru Malázia, Primeiru-Ministru Vietname,” Xanana Gusmão hateten ba jornalista sira hafoin ramata enkontru ho Xefe Estadu.
Aleinde ne’e, Xefe Governu informa mós ba Prezidente Horta katak semana kotuk nia parte simu vizita ida husi Diretór Jerál Ministériu Negósiu Estranjeiru España nian ne’ebé hakarak partisipa iha dezenvolvimentu Timor-Leste nian liuliu projetu tasi-mane.
“Informa mós ba Prezidente Repúblika katak ita simu Diretór Jerál Minist’eriu Negósiu Estranjeiru España nian, nia mai husi Madrid ko’alia ho ita sira hakarak partisipa iha projetu tasi-mane nian, entaun nia sei hasoru malu ho Ministériu Petroleu kona-ba prosesu ba oin,” Xanana dehan.
Nia dehan, kona-ba área petroleu nian iha semana kotuk Governu halo ona aprovasaun atu Ministériu Petroleu Rkursu Minerál (MPRM) atu loke konkursu públiku ba Suai Supaly Base no estrada husi Suai ba Betano no Natarbora.
Antes ne’e, Ministru Petróleu no Rekursus Minerais, Francisco da Costa Monteiro aprezenta iha Konsellu Ministru no deside atu autoriza halo despeza ne’ebé relasiona ho programa kona-ba “implementasaun projetu Tasi Mane iha Kosta Súl nasaun nian” ho montante $40.500.000.
Jornalista : Hortencio Sanchez
Editór : Cancio Ximenes
