OEKUSI, 13 Marsu 2025 (TATOLI) –Xefe Suku Cunha, Domingos Seco Caunan, preokupa empreza abandona projetu konstrusaun kapela Nunuheno ne’ebé konstrui iha 2022 iha aldeia Noafafo, suku Cunha, sub-rejiaun Pante Makasar, Rejiaun Administrativa Espesiál Oekusi (RAEOA).
“Projetu kapela ne’e harii iha mandatu autoridade anteriór iha tinan 2021 to’o ohin loron seidauk entrega, ami-nia observasaun projetu ne’e seidauk remata hanesan moru hale’u. Tan ne’e ami husu ba autoridade agora sei bele komunika ho kompañia atu finaliza obra ne’e tanba hari’i iha ha’u nia área, ha’u tenke buka tuir tanba saida mak la finaliza atu entrega ona ba Governu,” nia informa ba jornalista sira iha Oekusi, foin daudaun ne’e.
Notísia relevante:Rogério Lobato sei husu opiniaun Igreja Katólika bá turizmu kulturál Nunuheno
Hataan ba preokupasaun ne’e, Diretór Diresaun Rejionál Infraestrutura (DRI), Remigío Nuno Sila, rekoñese empreza projetu ne’e abandonaduno sei orienta ekipa tékniku hodi halo fiskalizasaun.
“Loos duni obra ne’e abandona, iha tempu besik Departementu Edifikasaun sei ba halo fiskalizasaun direita ba obra ne’e, tanba husi situasaun hirak-ne’e, parte diresaun sei deskute no haree asuntu ne’e atu haree prioridade tanba agora projetu paradu duni seidauk iha kontinuasaun, no komunika ho kompañia,” nia promete.
Projetu konstrusaun kapela ba turizmu kulturál Nunuheno ne’e, ezekuta hosi empreza Grand Enklave Unip. Lda, ho valór orsamentu $440.844.93, ne’ebé aloka hosi Orsamentu Jerál Estadu (OJE) 2021 nian ho nia durasaun serbisu durante loron 120 ne’ebé envolve traballadór hamutuk na’in-14.
Entretantu, área ba konstrusaun fatin istóriku turízmu kulturál ne’e, hamutuk ektare 22, área semitériu inklui kapela kuadradu 4.760 ho nia medida ba konstrusaun metru kuadradu 15×12 no 7×24.
Ba hariis-fatin unidade rua ho nia medida metru 3×6 ho totál área metru kuadradu 18, no postu seguransa unidade rua ho nia medida metru 2,5×2,5 ho totál área metru kuadradu 6,25.
Nune’e kompleta ho lutu haleu fatin turízmu kulturál kilómetru 1,870, inklui portaun unidade rua, ida nia medida metru 11, ida seluk metru 6,5, no moos dreinajén.
Notísia relevante:Projetu turizmu kulturál Nunuhenu atraza tanba disputa rai
Jornalista: Abílio Elo Nini
Editór: Florencio Miranda Ximenes
