JICA entrega tradusaun kompleta instrumentu legál ASEAN nian ba MNEK

DILI, 14 Marsu 2025 (TATOLI)–Japaun liuhusi Agência Japan International Cooperation Agency (JICA) entrega tradusaun sira-ne’ebé kompleta ona instrumentu legál ASEAN nian ba Ministériu Negósiu Estranjeiru no Kooperasaun (MNEK).

Notísia Relevante: Timor-Leste prontu tama ASEAN kualker tempu

JICA entrega tradusaun ne’e bainhira Vise-Ministra ba Asuntu ASEAN, hala’o enkontru kortezia ho Diretór Divizaun Pasífiku no Sudeste Aziátiku, Iwano Junnosuke, iha edifisiu MNEK Praia dos Coqueiro Dili (atuál Avenida de Portugál), sesta (13 Marsu 2025) ne’e.

JICA nia kontribuisaun vitál sira ba Timor-Leste nia prosesu adezaun ba ASEAN, inklui programa kapasitasaun no tradusaun akordu ASEAN nian ba Tetun no Portugés.

Submisaun importante ida-ne’e inklui dokumentu 91 ne’ebé kompostu husi Instrumentu Jurídiku ASEAN hamutuk 76, ne’ebé tradús ho kuidadu husi versaun Inglés orijinál ba Tetun no Portugés.

“Tradusaun ne’e hetan finansiamentu husi JICA hanesan parte ida husi, projetu kona-ba hadi’a Koordenasaun no Monitorizasaun adezaun ba ASEAN ne’ebé la’o ona dezde fulan maiu 2024,” Iwano hateten.

Dokumentu sira-ne’ebé tradús kobre instrumentu xave sira iha pilár tolu Komunidade ASEAN nian, dokumentu 23 relasiona ho Komunidade Polítiku-Seguransa ASEAN (APSC), dokumentu sia (9) relasiona ho Komunidade Sósiu-Kulturál ASEAN (ASCC) no dokumentu 59 relasiona ho Komunidade Ekonómika ASEAN (AEC).

Ida-ne’e marka pasu importante ida iha Timor-Leste nia preparasaun ba adezaun tomak ba ASEAN iha tinan 2025.

Dokumentu sira-ne’ebé tradús sei fasilita aliñamentu enkuadramentu legál no regulatóriu Timor-Leste nian ho padraun sira ASEAN nian, hodi nune’e hasa’e nasaun nia prontidaun ba adezaun.

Hafoin entrega, MNEK nia ekipa legál sei halo revizaun ki’ik ba dokumentu sira ne’ebé tradús ona molok hato’o versaun finál ba Konsellu Ministru hodi halo apresiasaun.

Dokumentu sira-ne’e sei enkamiña ba Parlamentu Nasionál hodi halo ratifikasaun no depois ba Prezidente Repúblika hodi halo promulgasaun, ne’ebé sei publika iha “Jornal da República”.

Inisiativa ida-ne’e subliña esforsu kolaborativu entre Timor-Leste no parseiru internasionál sira hanesan JICA hodi fó apoiu ba nasaun ne’e nia integrasaun iha komunidade ASEAN.

Notísia Relevante: TL hein notifikasaun husi ASEAN halo negosiasaun ba akordu komérsiu

Jornalista : Hortencio Sanchez

Editór        : Cancio Ximenes