OEKUSI, 18 Marsu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Sekretáriu Rejionál ba Asuntu Administrasaun hamutuk ho Diresaun Rejionál Infraestrutura (DRI), hatu’ur fatuk dahuluk hodi konstrui sede suku Costa iha sub-rejiaun Pante Makasar ho kustu $84.000, fundu ne’e mai husi fundu infraestrutura nasionál.
Biban ne’e, Sekretáriu Rejionál ba Asuntu Administrasaun, Andre Lao,relata katak konstrusaun ne’e konsidera importante tanba molok Autoridade komunitáriu suku Costa, husu atu konstrui sede foun tanba edifisíu tuan ladun seguru atu halo atendimentu administrasaun suku nian.
Notísia relevante:Francisco Colo, eleitu ba xefe suku Costa no promete tau matan ba aldeia lima
“Tinan kotuk xefe suku mak hatama proposta ba Autoridade RAEOA, hodi husu atu halo konstrusaun foun, tanba edifisíu tuan ladun luan no séguru atu halo atendimentu, no suku ne’e rasik nia área luan, akumula populasaun barak, entaun presiza halo konstrusaun foun ida, nune’e bele mellora atendimentu administrasaun suku nian,” nia dehan iha ámbitu lansamentu ne’e.
Konstrusaun ne’e ezekuta husi kompañia Nisboc Unipesoál Lda ho valór kontratu $84.000, Orsamentu ne’e Autoridade RAEOA aloka husi Orsamentu Jerál estadu (OJE) 2025 nian ho durasaun servisu fulan-neen.
Nune’e, Diretór Diresaun Rejionál Infraestrutura, Remigio Nuno Sila, informa projetu ne’e aprova husi Konsellu Administrasaun Fundu Infraestrutura (KAFI) rejionál datoluk nu’udar projetu emerjénsia ba tinan ne’e.
Tan ne’e, Diresaun Rejionál Infraestrutura fó hanoin ba kompañia konstrutora atu kumpre kontratu no garante kualidade.
“Edifisíu ne’e nia medida 8×9 ho tipu konstrusaun ita halo andar lantai ida, ne’e inisiátiva rasik husi autoridade suku Costa tanba kondisaun sede suku ladun seguru tan ne’e presiza duni kompañia halo ho kualidade no kumpre termu kontratu, nune’e iha tempu badak bele fasilita hodi mellora servisu di’ak liutan, tanba área suku Costa luan akumula populasaun barak entaun presiza duni fatin ida di’ak,” nia informa.
Xefe Suku Agradese
Entretantu, Xefe suku Costa, Fransisco Colo, hato’o agradesimentu ba Governu liuliu Autoridade RAEOA tanba proposta ne’e submete iha 2024 hetan ona aprovasaun hodi konstrui edifisíu suku Costa iha tinan ne’e.
“Lori komunidade Costa nia naran hato’o agradese ba Governu liuliu autoridade AREOA, tanba konsidera ami-nia proposta. Daudaun Governu destaka funsionáriu na’in-haat iha sede suku no estensionista husi agrikultura mós mai iha ne’e, Ofisiál Polísia Suku (OPS) entaun presiza kondisaun mós, ita haree sede ne’e nia kondisaun ladun seguru liuliu dokumentu sira tenke tau iha fatin di’ak,” nia orgullu.
Notísia relevante:KAFI Oekusi aprova projetu emerjénsia 26 ho kustu millaun $36-resin
Jornalista: Abílio Elo Nini
Editór: Florencio Miranda Ximenes
