OEKUSI, 19 Marsu 2025 (TATOLI) – Xefe Suku Cunha, Domingos Seco Caunan, rekomenda ba Autoridade Rejiaun Administrativa Espesiál Oekusi Ambeno (RAEOA) hodi halo inagurasaun, nune’e bele utiliza ona terminál Tono hodi fasilita movimentu transporte sira.
Durante ne’e, Tuir autoridade lokál katak akontese problema transporte, liuliu kondutór sira istória malu, tanba karreta nia husi foho ba liu vila laran ho pasajeiru no laiha opurtunidade ba mikrolete sira atu hetan osan.
Notísia relevante:Autoridade RAEOA xamada kompañia Grand Enclave ba projetu terminál Tono
“Projetu Terminál Tono ne’e harii kedas iha 2022, maibé agora seidauk utiliza. Ita haree obra ne’e hotu ona, kompañia mós la halo ona servisu iha Tono só seguransa mak iha, tan ne’e ita espera bele inaugura atu funsiona hodi fasilita transporte sira,” nia dehan ba Jornalista sira iha Oekusi, foin lalais ne’e.
Hataan ba rekomendasaun ne’e, Diretór Diresaun Rejionál Infraestrutura (DRI), Remigío Nuno Sila, rekoñese projetu terminál to’o agora seidauk utiliza tanba sei hein pedidu mai husi kompañia konstrutora.
“Projetu ne’e nia progresu konklui ona 100% liuhusi sertifikasaun finál ona husi Diresaun Rejionál Infraestrutura no Ajénsia Dezenvolvimentu Nasionál , ita hein de’it kompañia hato’o pedidu mai diresaun liuhusi xefe departementu transporte, nune’e bele entrega ona,” nia informa.
Notísia relevante:Motorista mikrolete ezije DNTT Oé-Cusse regula movimentu angguna no tum-tum
Rekorda katak molok ne’e motorista mikrolete sira ezije ba Diresaun Nasionál Transporte Terrestre (DNTT) atu regula movimentu karreta angguna no tum-tum iha Oé-Cusse vila tanba laiha terminál ida, no ejize mós Prezidente Autoridade RAEOA atu halo ona inaugurasaun ba terminál Tono, tanba durante ne’e fatin propriu ba terminál nian iha Oé-Cusse seidauk ejiste.
Tanba ne’e tuir portavós motorista José Palat, hateten, durante ne’e, karreta angguna no tum-tum halo sirkulasaun la tuir regra, okupa dalan mikrolete sira iha vila, nune’e afeta ba sira ladun hetan lukru kada loron.
Enkuantu projetu terminál Tono implementa husi kompañia Grand Enklave Unipesoál Lda mak ezekuta, hahú kedas iha 2022 ho valór kontratu hamutuk $226,017.38.
Orsamentu ne’e Autoridade RAEOA aloka husi Orsamentu Jerál Estadu (OJE) 2022 nian ho durasaun servisu fulan haat de’it maibé iha 2023 kompaña abandona no kontinua fali iha 2024 ne’e.
Notísia relevante:Rogério Lobato promete sei inaugura Terminál Tono iha tempu-badak
Jornalista: Abílio Elo Nini
Editór: Florencio Miranda Ximenes
