OEKUSI, 25 Marsu 2025 (TATOLI) – Ekipa konjunta liderada husi Sekretáriu Estadu Asuntu Toponímia no Organizasaun Urbana (SEATOU), Germano Santa Brites, akompaña husi Autoridade Rejiaun Administrativa Espesiál Oekusi Ambeno (RAEOA), tersa ne’e, sobu ona lutu futu-manu no barraka negosiante ne’ebé hari’i iha bairru 01 de Maio-Palaban, suku Costa, sub-rejiaun Pante Makasar.
Tuir loloos fatin ne’e la merese atu loke jogu tradisionál futu-manu tanba okupa rai Estadu no besik eskola sira, nune’e presiza muda ka buka fali fatin seluk do’ok husi vila.
Notísia relevante:24 Abríl, SEATOU husu negosiante iha merkadu Numbei-Oekusi hamamuk fatin
“Ita hetan nafatin keixa katak lorokraik- lorokraik fatin ne’e tama sai ladi’ak, entaun ohin ita foti desizaun mai sobu, nune’e fatin ne’e livre ba ema hotu no transporte sira-bele halo movimentasaun,” Sekretáriu Estadu Asuntu Toponímia Organizasaun Urbana, Germano Santa Brites, hateten iha 01 de Maiu Palaban, ohin.
Nia hatutan: “Fatin ne’e harii iha rai Estadu, ita haree la merese tau iha fatin ne’e, tanba ema barak uza fatin ne’e la’o ba mai liuliu besik eskola, nune’e ida-ne’e fó edukasaun ladun di’ak ba estudante sira hafoin komunidade sira mós hato’o keixa katak kalan-kalan ema hakilar to’o tuku 12:00, nune’e ita tenke sobu”.
Nia informa, sasán sobu hanesan besi, kalen inklui ai-maran konsidera tama ba patrimóniu Estadu, nune’e ekipa ordén públika kontinua transporta atu hatama ba Estadu ou bele oferese ba orfonatu sira.
“Karik na’in la koopera dalan nakloke bele ba keixa iha tribunál, keixa ha’u ka keixa autoridade depois ha’u bele ba hatan importante mak ne’e ha’u tenke hadi’a fatin ba interese públiku tanba fatin ne’e okupa espasu públiku no afeta ba ema barak nia movimentu,” nia hateten.
Iha fatin hanesan, Emanuel da Conçeição, nu’udar na’in ba lutu futu-manu ne’e rekoñese katak fatin ne’e espasu públiku, nune’e nia koopera ba oin sei buka fali fatin seluk hodi do’ok husi dalan públiku.
“Ha’u-nia dokumentu kompletu antes ne’e ha’u trata iha SERVE, maibé ohin desizaun Governu katak fatin ne’e okupa espasu públiku, nune’e ita nu’udar sidadaun kumpre no laiha problema, nune’e parese fatin atu halo dezenvolvimentu seluk tan ne’e ha’u tenke koopera,” nia afirma
Rekorda fali katak, fatin futu-manu kompleta ho barraka ba negosiante sira, harii iha 2022 nu’udar programa ida husi feira lokál hodi komemora loron Restaurasaun Independensia 20 Maiu.
Notísia relevante:Kampu 01 de Maio Palaban fatin ba komemorasaun 28 Novembru
Jornalista: Abílio Elo Nini
Editór: Florencio Miranda Ximenes
