OEKUSI, 25 Marsu 2025 (TATOLI) – Ekipa konjunta liderada husi Sekretáriu Estadu Asuntu Toponímia no Organizasaun Urbana (SEATOU), Germano Santa Brites, hato’o rekomendasaun ba Autoridade Rejiaun Administrativa Espesiál Oekusi Ambeno (RAEOA) atu identifika fatin foun hodi substitui semitériu públiku Santa-Roza tanba daudaun ne’e laiha ona espadu atu hakoi tan mate isin ho seguru.
“Ita haree semitériu públiku iha Santa-Roza ne’e nakonu ona, fatin mós klo’ot liu, tanba ne’e ha’u ohin husu Autoridade RAEOA atu haree ona fatin seluk liuliu halo identifika ba rai Estadu ida, nune’e bele tau osan ba 2026 atu halo alargamentu ba semitériu foun no taka ida agora ne’e,” SEATOU dehan iha Otél Ambeno.
Notísia relevante:24 Abríl, SEATOU husu negosiante iha merkadu Numbei-Oekusi hamamuk fatin
Hatan ba rekomendasaun ne’e, Sekretáriu Rejionál ba Asuntu Administrasaun, Andre La’o, rekoñese laiha ona espasu, nune’e iha tempu badak ekipa konjunta komposta husi Diresaun Terra no Propriedade no autoridade lokál buka rai Estadu hodi subtitui.
“Semitériu ne’e nakonu ona ohin ami simu ona rekomendasaun sira-ne’e, nune’e ami sei koordena ho Sekretáriu Rejionál ba Asuntu Terra no Propriedade hodi enkontru mós ho autoridade komunitáriu suku Costa atu identifika fatin ida rai Estadu, nune’e hato’o ba Prezidente Autoridade hodi ofisializa atu sai ona semitériu foun iha 2026 nian,” nia dehan.
Entretantu, semitériu públiku Santa-Roza lokaliza iha akdeia Oésono besik Ospitál Referál Oekusi nia sorin, pertensia ba suku Costa, sub-rejiaun Pante Makasar, Rejiaun Administrativa Espesiál Oekusi Ambeno (RAEOA).
Notísia relevante:SEATOU komprometidu hadi’a no organiza sidade tuir orden
Jornalista: Abílio Elo Nini
Editór: Florencio Miranda Ximenes
