BOBONARU, 28 Marsu 2025 (TATOLI)—Jestór Eletrisidade Timor-Leste, Empreza Públika (EDTL, E.P) Munisípiu Bobonaru, Mario de Jesús, klarifika daudaun ne’e sentru venda pulsa eletrisidade iha postu administrativu Bobonaru laiha, tanba Empreza lokál sira la interrese atu investe hodi loke negósiu ne’e.
Notísia Relevante: Kliente iha suku 18 Bobonaru la asesu sentru venda pulsa eletrisidade
Mario de Jesú hateten, foin lalais nia parte ho ekipa halo ona aproximasaun ho empreza lokál liu Negosiante sira loke negosiu iha merkadu Bobonaru villa, maibé to’o agora seidauk iha Empreza ida atu hasai lisensa ba negósiu ne’e.
Tuir nia, informasaun deputadu sira levanta foin lalais ne’e iha plenaria dehan katak EDTL, E.P la instala Sentru Venda Post iha postu Bobonaru ne’e la loos, tanba tuir regra negosiu ne’e EDTL, E.P fó ba Empreza lokál sira.
“Ha’u hakarak klarifika buat ida Sentru Venda Post ne’e ita fó ba kompañia lokál mak loke. Uluk kompañia ida naran Fitun-Kaduak loke tiha ona, maibé to’o ikus mai nia dada-aan ihaa to’o agora ha’u la hatene ninia paradeiru. Ha’u mós hato’o tiha ona ba ami-nia ezekutivu, ba oin ne’e, ami EDTL, E.P mak atu loke ka fó nafatin ba kompañia sira, tanba ha’u halo aproximasaun ho kompañia lokál, loja-na’in sira mais sira la hatán. Sira lakohi loke tanba saida, ha’u la hatene,” nia informa ba Agência Tatoli, iha nia kna’ar fatin, sesta ne’e.
Sorin seluk, komunidade Bobonaru, Felismina de Jesús Mau, hateten durante ne’e sira sempre karrega no sosa pulsa liu husi aplikasaun MOSAN.
“Atu sosa ami ba lansung ema-nia uma de’it. Dalaruma hotu, ami husu fali ba família sira iha Maliana ho Dili lai mak ense fali. Ne’ebé, ami iha Bobonaru villa ne’e la araska ida. Sira balun iha suku dook ne’e mak araska karik,” nia dehan.
Felismina reforsa, iha tinan hirak liuba kompañia lokál ida konsege loke duni sentru Venda Post, maibé la kle’ur taka fali to’o agora, tanba menus reseita no problema liña internet.
“Dalaruma ho problema sira-ne’e mak ema lakohi atu loke loja faan pulsa EDTL ne’e, tanba Bobonaru ne’e ahí mate depois udan tan ne’e, jaringan aat loos. Ita ba hola pulsa ne’e antrian loos,” nia dehan.
Enkuantu postu administrativu Bobonaru iha suku 50 no aldeia 63.
Notísia Relevante: EDTL Bobonaro la deteta ligasaun ilegál durante sistema falla
Jornalista : Sergio da Cruz
Editór : Cancio Ximenes
