OEKUSI, 01 Abríl 2025 (TATOLI) – Konsellu Administrasaun Fundu Infraestrutura (KAFI), Rejiaun Administrativa Espesiál Oekusi Ambeno (RAEOA), aprova tan projetu emerjésia ida atu konstrui morru protesaun hodi proteje natar sira-ne’ebé hetan ameasadu husi korrente mota iha área Kinloki, suku Naimeko, sub-rejiaun Pante Makasar.
“Desizaun finál iha loron 31 Fevereiru 2025, ita deside projetu emerjénsia 28, maibé hafoin halo ordén servisu ita aprova de’it 26 tanba kompañia rua la priénxe rekezitu, maibé ikus mai kompañia ida, esforsa agora kumpre ona rekezitu, nune’e ita aprova tan hela ida mak seidauk kumpre, ne’ebé projetu emerjénsia KAFI datoluk iha Oekusi ba tinan ne’e hamutuk 27 projetu,” Diretór Diresaun Rejionál Infraestrutura, Remigío Nuno Sila, dehan iha Oekusi.
Notísia relevante:KAFI Oekusi aprova projetu emerjénsia 26 ho kustu millaun $36-resin
Daudaun ne’e kompañia kumpre hela orientasaun hodi ezekuta orden servisu atu konstrui morru protesaun hodi proteje natar sira iha mota Kinloki, suku Naimeko, sub-rejiaun Pante Makasar.
“Kompañia agora sira hala’o hela orden servisu hahú hamoos ona fatin konstrusaun inklui mobiliza ona materiál ” nia afirma.
Molok ne’e, Konsellu Administrasaun Fundu Infraestrutura (KAFI), Rejiaun Administrativa Espesiál Oekusi Ambeno (RAEOA), liderada husi Prezidente Autoridade RAEOA, aprova uluk projetu emerjénsia 26 ho kustu millaun $36,928,720.47, ne’ebé aloka mai husi fundu infraestrutra nasionál atu ezekuta iha tinan ne’e.
Entretantu, tuir dokumentu ne’ebé Ajénsia TATOLI,I.P asesu iha Diresaun Rejionál Infraestrutura (DRI) katak, KAFI dahuluk konsege ezekuta projetu hamutuk tolu (3), KAFI daruak ezekuta projetu ualu (8) projetu lima kona-ba reabilitasaun estrada rurál sira, ponte rua no gabiun ida no KAFI datoluk mak sei ezekuta projetu 27 iha tinan ne’e.
Notísia relevante:KAFI Rejionál sei buka solusaun ba problema reabilitasaun estrada Oébaha bá Bitopa
Jornalista: Abílio Elo Nini
Editór: Florencio Miranda Ximenes
