BOBONARU, 03 Abríl 2025 (TATOLI)—Sentru Saúde Komunitária (SSK) Kakanea iha suku Lourba, postu administrativu Bobonaru, munisípiu Bobonaru, dezde tinan 2018 to’o agora enfrenta problema labele asesu bee-moos hodi pesoál saúde sira atu utiliza ba nesesidade sanitária loro-loron inklui halo atendementu ba pasiente sira.
Xefe Sentru Saúde Komunitária Kakanea, Agapito Bere Sai, haktuir iha tinan 2008 ne’e Servisu Agua no Saneamentu (SAS) konsege halo kanalizasaun bee-moos husi suku Tebabui mai sentru saúde Lourba, maibé iha 2018 ne’e paradu fali tanba ema dezkonesidu tesi-estraga hotu sistema kanalizasaun bee-moos no husik abandona to’o agora.
Nia dehan, to’o agora nesesidade sanitária loro-loron iha SSK Kakanea depende de’it ba udan-been maibe tempu bailoro obrigatóriu pesoál saúde sira tenke hasai rasik osan hodi sosa bee no ba kuru-bee iha mota.
Notísia Relevante: BTL, E.P inisia fornese bee-moos ba komunidade Bobonaro no Covalima
“Ami-nia problema mak laiha bee-moos. Iha tempu bailoro bee menus, ami atu ba haris fatin, pasiénsia sosa Aqua iha kioske hodi uza. Dalaruma kolega sira iha ne’e, pasiente sira mós mai atu partu, dezenaraska tenke ba kuru-bee iha mota. Maske ami hasoru problema maibé ami-nia atendementu ba komunidade la’o normal,” Nia informa asuntu ne’e ba Agência Tatoli, iha nia kna’ar fatin, kuarta (02 Abríl 2025) ne’e.
Responsavél Sentru Saúde Komunitária ne’e sekunda, problema referida responsavél Sentru Saúde sesante no nia parte mós hato’o beibeik ona parte kompetente, maibé to’o agora seidauk iha resposta.
Foin lalais ne’e, nia dehan, parte Diresaun Servisu Munisipál Saúde Munisípiu Bobonaru apoia ona tanke bee-moos no hetan mós apoia mangeira rolu rua (2) ho totál metru 400 husi deputadu Carminda Carlota hanesan Bobonaru-oan, maibé la sufisiente atu halo instalasaun bee-moos.
“Ami hein husi parte Servisu Munisipál Agua no Saneamentu atu apoia tan mangeira rolu tolu hodi instala provizóriu husi sistema Tapo foti husi xefe xuku Lourba nia uma mai iha Sentru Saúde. Aleinde ida-ne’e mós, planu ba longu prazu nian, sei halo instalasaun foun husi suku Mali-Ubu, bee-matan Bulobu ne’e mai iha ne’e,” nia dehan.
Aleinde problema ne’e, nia hateten SSK Kakanea mós enfrenta problema menus rezidénsia ba pesoál saúde sira atu bele hala’o sira-nia kna’ar loro-loron hodi halo atendementu ba pasiente sira.
“Ami sira servisu iha Sentru Saúde Lourba, maioria husi Maliana, Kailaku, Marobo, husi Bobonaru no Hauba. Entaun rezidénsia ne’ebé mak suku Lourba oferese ona ida kuartu rua maibé la sufisiente atu ami bele mantein prestasaun servisu ho di’ak. Presiza apoia hodi aumenta rezidénsia,” nia hateten.
Sorin seluk, Diretór Servisu Munisipál Agua no Saneamentu Munisípiu Bobonaru, Armindo Cardoso Barros, hateten iha tempu badak sei mobiliza materiál no tékniku sira halo instalasaun bee-moos ba Sentru Saúde Kakanea.
“Ita prosesa tiha ona, hein fornesedór atu fornese materiál mai. Fulan ida-ne’e no Maiu nia laran, ita-nia tékniku sira ba implementa ona. Ami sei apoia Mangeira rolu tolu no asesoria balun, halo instalasaun emerjénsia iha sistema Tapo, nune’e fasilita Sentru Saúde ne’e asesu bee-moos. Depois, mak ita haree fali rekursu bee husi fatin seluk, nune’e uza ba tempu naruk,” nia dehan.
Enkuantu atendementu saúde SSK Kakanea kobre suku sia (9), aldeia 31 no provizóriu halo mós atendementu emerjénsía ba komunidade iha suku Atara, Obulo, postu administrativu Atsabe, Munisípiu Ermera no suku Lepo, postu administrativu Zumalai, munisípiu Kovalima, tanba kondisaun estrada iha suku viziñu la permite.
Notísia Relevante: Komunidade Lontas preokupa projetu instalasaun bee-moos seidauk finaliza
Jornalista : Sergio da Cruz
Editór : Cancio Ximenes
