DILI, 10 Abríl 2025 (TATOLI)–Governu liuhosi Ministra Ensinu Superiór Siénsia no Kultura (MESSK), José Honório da Costa Pereira Jerónimo, prefere peskizadór tenke aprezenta rezultadu peskiza ba Konsellu Ministru (KM).
“Husu ba peskizadór sira atu halo peskiza ho di’ak ho rigór no peskiza ne’e ninia rezultadu halo aprenzentasaun iha Konsellu Ministru, hanesan nível polítiku hatene saida mak akontese iha ita-nia país”, dehan nia iha salaun Institutu Nasionál Sientífiku no Teknolojia (INCT-sigla portugés), Balide, kinta ne’e, hafoin partisipa serimónia asina kontratu peskiza ho grupu-sia.
Nia dehan tempu fulan-lima ba peskizadór sira halo peskiza, molok konklui sira sei halo aprezentasaun pre-limináriu. Peskizadór sia ne’e maihusi Universidade Nasionál Timor Lorosa’e, Institutu Politékniku Betanu (IPB), IOB, Kristal no sentru peskiza sira.
Objetivu hosi peskiza ne’e tulun governu sira, oinsá bele halo planu polítika tuir rezultadu ne’ebé iha, nune’e bele halo dezenvolvimentu.
Reprezentante peskizador, Krispin Fernandes, agradese tanba bele hola parte. “Ita hotu konsiente katak siénsia no teknolojia no área peskiza no inovasaun mak sai hanesan plataforma ba dezenvolvimentu, más ita sei iha prosesu ne’ebé naruk”.
Nia apresia esforsu husi governu liuhusi INCT promove peskiza iha área siénsia no teknolojia. “Espera ba oin ministériu sira bele uza rezultadu peskiza”.
Orsamentu ne’ebé prevee ba grupu-sia hamutuk rihun $35.
Notísia relevante: INCT aprova projetu investigativu sientífiku ba grupu-sia
Jornalista : Osória Marques
Editora : Rita Almeida
