KOVALIMA, 14 Abríl 2025 (TATOLI) – Programa Nasionál Dezenvolvimentu Suku (PNDS) elabora ona Planu Asaun Anuál (PAA) 2026, ne’ebé fó prioridade hodi implementa projetu setór importante hamutuk 63 iha munisípiu Kovalima.
Diretór PNDS Munisípiu Kovalima, Pedro Gomes de Araújo informa katak, projetu 63 ne’ebé atu implementa iha 2026 fó prióridade ba setór importante sira hanesan Saúde, Edukasaun, Agrikultura, Obra Públika no setór seluk.
“Ita-nia proposta projetu atu implementa 2026, iha munisípiu Kovalima projetu hamutuk 60 de’it maibé tanba aumenta ho halo manutensaun projetu ne’ebé implementa iha tinan rua ba kotuk nune’e projetu hamutuk 63”, Pedro Gomes de Araújo hateten ba jornalista sira iha nia serbisu fatin PNDS Kovalima, ohin.
Dirijente ne’e esplika katak projetu 63 ne’e sei implementa iha suku 30, postu administrativu hitu ne’ebé pertense mai iha munisípiu Kovalima, nune’e kada suku PNDS deside sei implementa projetu rua ne’ebé propoin mai husi komunidade sira.
“Razaun kontinua atu halo manutensaun ba projetu rua ne’ebé iha tinan kotuk tanba fundu infraestrtura fó oportunidade mai ita atu halo manutensaun ba projetu ne’ebé iha tinan rua ba kotuk ho nia orsamentu 15% husi orsamentu infraestrutura suku”, nia dehan.
PNDS implementa projetu 63 liga ho interministérial ne’ebé fó prióridade setór neen hanesan Saúde (la iha), Edukasaun haat, Agrikultura rua, Obra Públika 36, Bee-moos 11 no setór seluk 10 haree ba konstrusaun no reabilitasaun kapela no sede aldeia.
Tuir Matadalan PNDS halo ona mudansa implementa projetu hanesan edukasaun la halo ona konstrusaun morru foku ba konstrusaun uma merenda eskolár bainhira halo konstruisaun morru ba klínika sira.
Iha PAA 2026, PNDS Kovalima propoin orsamentu $2.024,53 fahe ba kategória hanesan, saláriu no vensimentu rihun $295,823, kategória bens no servisu rihun $141,960 hodi uza halo manutensaun no kombustível karreta no motorizada no sosa tinta fotokopia.
Transferénsia públiku hamutuk $1.515.00 ne’ebé sei fahe ba transferénsia fundu suku tuir distánsia husi munisípiu ba iha suku no totál populasaun bazeia ba Sensu fó fila 2022 .
Aleinde ne’e, transferénsia infraestrututura $1.338.500 hodi fahe ba kategoria rua hanesan uza orsamentu hodi konstrui no halo reabilitasaun ba projetu ne’ebé mak komunidade sira propoin no osan ba operasionál hamutuk $176,500 uza hodi selu insentivu ba estrutura suku PNDS na’in hitu maibé na’in neen de’it mak hetan insentivu uza ba enkontru, kapasita estrutura suku no kustu viajen.
Mekanizmu selu insentivu ba estrutura suku bazeia ba atividade hanesan sorumutu responsabiliza ba dahuluk no pagamentu hafoin sorumutu responsabilidade ikus insentivu mai husi orsamentu operasionál suku.
Jornalista: Celestina Teles
Editór: Rafael Ximenes Belo
