OEKUSI, 22 Abríl 2025 (TATOLI)– Ministériu Edukasaun (ME) liuhusi Sekretáriu Estadu Ensinu Sekundáriu Jerál no Tékniku Vokasionál, abertura formasaun kona-ba istória ba dame ba manorin 40 husi ensinu báziku terseiru siklu, Ensinu Sekundáriu Jerál no Tékniku Vokasionál iha Rejiaun Administrativa Espesiál Oekusi Ambeno (RAEOA).
Sekretáriu Estadu Ensinu Sekundáriu Jerál no Tékniku Vokasionál, Domingos Lopes Lemos, hateten katak formasaun ne’e ho obejtivu atu hasa’e koñesimentu ba manorin sira-ne’ebe hanorin dixipliña liuliu istória atu hanorin istória sira ho loloos ba estudante sira iha prosesu aprendizajen.
Notísia relevante:Governu no parseiru lansa programa formasaun epidemiolojia kampu
“Ohin, ita estabelese formasaun ne’e ba manorin sira atu transmite di’ak liutan istória sira ba ita nia estudante sira nu’udar jerasaun ba rai ne’e, tanba ita-nia profesór sira tenke hanorin tuir kuríkulu ne’ebé ministériu Edukasaun hatuur ona, nune’e bele hanorin oan sira ho loloos,” nia dehan iha otél Ambeno.
Tanba ne’e, nia epela ba formanadu sira atu partisipa másimu tanba matéria formasaun sira-ne’e, kabe ba instória prosesu ukun rasik-an Timor-Leste nian, relijiaun no istória seluk tan.
“Formasaun ne’e importante tebes ba profesór sira, tanba ne’e durante loron lima nia laran, husu manorin sira atu partisipa ho sériu no kuidadu, tanba ne’e istória, ita labele halimár no manipula, entaun formasaun ne’e tenki rona didi’ak husi formadór sira, ita buat ruma la komprende bele promove diskusaun, nune’e bainhira remata fila-fali transmite ba estudante sira hodi kompriende atu kontinua istória ne’e ba futuru,” nia apela.
Iha fatin hanesan, Diretór Rejionál Rekursu Umanu, Cebastião Iku, reprezenta Sekretária Rejionál Edukasaun no Asuntu Sosiál, agradese ba Ministeriu Edukasaun tanba bele fasilita kapasitasaun ba profesór sira iha Oekusi.
“Ami agradese ba Ministériu, tanba formasaun foin dahuluk realiza ba profesór sira iha oekusi, ida-ne’e orgullu bo’ot ba ami Oekusi-oan, tanba ko’alia kona-ba hanorin baibain profesór sira prátika ona, maibé presiza formasaun nune’e it abele hanorin mós la’o tuir matadalan ida ka kuríkulu ida, nune’e bele hariku liutan ita-nia manorin sira, hodi hanorin alunu sira sai di’akliu tan,”
Entretantu, Agustinho Neca husi Eskola Tékniku Vokasionál (ETV) Palaban, orgullu tanba formasaun bele haforsa liutan kapasidade manorin sira atubele transmite matéria ba estudanate sira ho loloos.
“Ami konsidera formasaun utíl ba ami atu sai referénsia atu hato’o ba estudante sira nu’udar jerasaun kontinuadór, ne’ebé polítika kapa’as tebes ba ami hanesan autór manorin na’in, tanba ne’e ami-nia esperánsa liuhusi formasaun ne’e ba oin kontinua haforsa formasaun, atu aumenta ami-nia koñesimentu no kapasidade liuliu ba asuntu edukasaun nian,” nia orgullu
Entretantu, partisipa iha abertura fromasaun ne’e mai husi Koordenadór Projetu UNESCO, Iteli Kim, Reprezentante Diretór Ezekutivu Centru Nasionál Chega (CNC), Alexandre Hornai Pinto no Prezidente INFORDEPE Domingos Martins.
Notísia relevante:ME sei prioritiza problema infrastrutura edukasaun iha teritóriu
Jornalista: Abílio Elo Nini
Editór: Florencio Miranda Ximenes
