Rogério Tiago Lobato: “Sarani sira iha mundu lakon figura kreda Katólika di’ak ida”
OEKUSI, 23 Abríl 2025 (TATOLI) – Prezidente Autoridade Rejiaun Administrativa Espesiál Oékusi Ambeno (RAEOA), Rogério Tiago Lobato, konsidera ho falesimentu Sua Santidade Papa Francisco hatudu sarani sira iha mundu lakon nia figura di’ak ida iha kreda Katólika tanba Papa Francisco defende no tau matan maka’as ba sira-ne’ebé ki’ak no marjinalizadu iha mundu rai-klaran.
Notísia relevante:Papa Francisco nu’udar aman ba fraternidade umana
“Ha’u sente triste tanba Nia (Papa Fracisco) rasik mak fó bensaun mai ha’u ho ha’u-nia señora no fó tersu ba ami-nia na’in-rua, ne’ebé nia mate ne’e hanesan ita lakon belun di’ak ida, ba mundu no lakon figura di’ak ida iha igreja Katólika, nia bele ho idade ida ke avansadu tebes, maibé nia hiit-aan mai to’o Timor, tanba depoizde Vátikanu, segundu mais Katólika iha mundu mak Timor-Leste, entaun ita lakon duni figura di’ak ida,” Prezidente Autoridade RAEOA ne’e informa ba jornalista sira hafoin sunu lilin hodi presta omenajen ba Papa Francisco nia mate, iha suku Bene-Ufe, ohin.
Eis-Komandante FALINTIL iha 1975 ne’e, apela nafatin ba ema hotu liuliu joven sira katak presiza ka’er metin mensajen Papa nian, bainhira prezide misa iha Tasi-Tolu tanba fó inspirasaun ba timoroan atu fiar Maromak no kultura.
Notísia relevante:Papa nia lian ikus antes hakotu iis: “Obrigadu tanba lori ha’u fila-fali ba prasa”
“Papa nia mensajén sira ha’u sei ka’er metin katak futuru ba ita-nia rai ne’e mak povu, tanba povu mak na’in ba rai ne’e, bainhira ita fó edukasaun di’ak ba ita-nia oan sira, sira mak loron ida sei tane ita-nia rai, nia ko’alia kona-ba kultura Timor-Leste, hanesan kultura ida foun bainhira Portugés sira tama husi Lifau Oekusi ne’ebéha’u sente ita tenke ka’er metin nia mensajén sira,” nia apela.
Nia informa, katak Amo Papa hiit-aan mai vizita pastorál to’o Timor-Leste, fó valór ba kristianizmu ne’ebé tama iha Timor-Leste liuhusi odamatan Lifa. “Ne’e duni ita hotu sente triste, tanba ita lakon ema ida di’ak, maibé prontu ne’e distiñu ema hotu nian, ita hotu ne’ebé sei moris, loron ida ita tenke mate”.
“Nia (Papa) ba uluk ona, ita harohan nafatin ba Maromak katak nia iha leten aas ba, bele tau matan nafatin ba sarani hotu iha mundu tomak, espesiálmente ba povu Timor-Leste, nune’e bele haree malu hanesan maun-alin, mezmu iha diferénsia, maibé la halo ita sai fraku maibé diferénsia sira-ne’e halo ita sai forte liutan,” nia hateten.
Notísia relevante:Sarani sira sunu “lilin domin” iha Papa Francisco nia ain-le’ut Tasi-Tolu
Jornalista: Abílio Elo Nini
Editór: Florencio Miranda Ximenes
