Vizita dahuluk PM Xanana bá Maunaebeno halo komunidade kontente
OEKUSI, 30 Abríl 2025 (TATOLI)–Komunidade sira iha aldeia Maunaebeno suku Cunha sub-rejiaun Pante Makasar, Rejiaun Administrativa Espesiál Oekusi Ambeno (RAEOA), hato’o sentimentu ksolok ba Primeiru-Ministru, Kay Rala Xanana Gusmão, tanba foin dahuluk vizita fatin referidu, hafoin loke estrada ba populasaun sira atu asesu ba merkadu.
Notísia relevante:Oekusi-oan tenke unidade hodi simu desentralizasaun administrativa no podér lokál iha 2027
Sentimentu ksolok ne’e hato’o husi Xefe suku Cunha, Domingos Seco Caunan, iha ámbitu simu Xefe Governu iha aldeia Maunaebeno, kuarta ne’e.
“Tuir loloos ami konsentra iha fatin ida, maibé komunidade sira lakohi, balu hein iha kraik no balu hein iha leten, deskulpa tanba ne’e la’ós ami mak hakarak halo planu ne’e, maibé ita-nia komunidade dalaruma kontenti liu, la rona tan ami autoridade lokál, tanba primeira-vés Avo tama mai vizita fatin ne’e dezde ukun-an”, katak Caunan.
Iha biban ne’e, autoridade lokál ne’e, espresa nia orgullu no kontenti, tanba Governu ne’e hanoin atu loke estrada tama ba Maunaebeno.
“Hahú ohin, ami-nia estrada di’ak ona, no ohin Avo Nana konsege liu mai to’o ami-nia fatin, maske seidauk to’o 100% maibé bele asesu ho di’ak ona”, nia dehan.
“Durante ita ukun rasik-aan, komunidade aldeia Maunaebeno, foin primeira-vés, rona katak ohin Maun Boot atu liuhusi husi dalan ne’e, tan ne’e ohin preparasaun dezde dadersan to’o loraik ne’e, la’ós ha’u mak orienta maibé inisiátiva rasik, ha’u bele konta uitoan katak, uluk dalan sei liuhusi sorin, tanba estrada Maunaebeno labele liu tanba aat, sira rona katak Avo Nana husi Nítibe atu ba Oesilo, sira ba hein fali iha mota Noetoko, tanba balu seidauk haree ho matan, haree de’it foto”, nia konta ho ksolok.
Notísia relevante:Estrada difikulta komunidade Maunaebeno faan produtu iha merkadu
Iha biban ne’e, Primeiru-Ministru, Kay Rala Xanana Gusmão, husu komunidade sira prepara oan sira bá eskola no prepara produtu faan iha merkadu tanba estrada di’ak ona.
“Imi hato’o agradese ba Autoridade RAEOA, tanba loke ona estrada mai to’o imi-nia fatin, atu fasilita imi, la’o ba mai, liuliu oan sira bá eskola, bá merkadu, maibé ami sei lori ponte ida husi Manatutu atu mai tau iha aldeia Maunaebeno ne’e, atu bele tau iha mota sa’e mai imi rai hela fatin”, dehan Primeiru-Ministru.
Jornalista : Abílio Elo Nini
Editóra : Rita Almeida
