PA RAEOA husu Governu estende kooperasaun ho Hunan to’o Oekusi
OEKUSI, 02 Maiu 2025 (TATOLI) – Prezidente Autoridade Rejiaun Adminitrativa Espesiál Oeksusi Ambeno (RAEOA), Rogério Tiago Lobato, husu Primeiru-Ministru (PM), Kay Rala Xanana Gusmão, atu kontinua hao estensaun kooperasaun ho Provínsia Hunan, Repúblika Populár Xina hodi oferese formasaun tékniku ba agrikultór sira iha Oekusi.
Rogério Lobato hato’o nia rekomendasaun ofisiál ne’e, iha serimónia kolleta hare ektare 27 iha suku Lifau, sub-rejiaun Pante Makasar.
“Ami bá rasik to’o iha Manatutu buka atu aprende ho ita-nia belun sira husi Provínsia Hunan ne‘ebé introdús sistema ida di’ak teb-tebes. Ami hakarak sistema ida-ne’e atu mai mós iha Oekusi, tanba iha-ne’e rai bo’ot no ema barak moris ho natar. Tanba ne’e, ha’u hakarak husu Primeiru-Ministru oinsá ita-nia belun sira husi Hunan bele mai mós iha Oekusi, mai hanorin ami tanba ami hamro’ok atu aprende, ami la hatene buat hotu-hotu,” Rogério Lob, to hateten.
Notísia relevante:Timor-Leste no Provínsia Hunan Xina reafirma akordu kooperasaun
Kona-bá ne’e, Primeiru-Ministru, Kay Rala Xanana Gusmão, dehan Prezidente Autoridade RAEOA husu atu haruka tékniku sira husi Xina ne’ebé daudaun ne’e hala’o hela servisu iha Manatutu atu mai hodi ajuda mós iha Oekusi tanba sira iha tékniku kona-bá kuda hare, oinsá ko‘a no prodús.
“Ida-ne’e mak ita tenke implementa, nune’e ita labele hola fali foos mai husi Dili. Ne’e di’ak, maibé seidauk sufisiénte tanba iha Dili mós sosa husi rai li’ur. Ita-bele prodús, maibé Governu mak laiha planu di’ak. Ne’e mak buat hotu-hotu paradu. Ne’e duni, ami ferik ho katuas sira, ami fi’ar Sekretária Rejionál Agrikultura, tenke servisu maka’as. Foin daudaun ne’e ami ba iha Hunan ho Prezidente Autoridade husi munisípiu lima atu aprende tanba sira rai bo’ot tebtebes, bele kuda ai-fuan barak,” PM Xanana hateten.
Entretantu, iha loron 13 to’o loron 17 fulan Abril 2025, Primeiru-Ministru hala’o vizita bá Provinsia Hunan no hasoru-malu ho Governadór Mao Weiming ne’ebé durante ne‘e estabelese ona kooperasaun hodi apoia munisípiu Manatuto, no husu atu kontinua estende tán kooperasaun ho munisípiu haat iha Timor-Leste mak hanesan munisípiu Baucau, Ainaro, Covalima no Manufahi.
Governu Timor-Leste ho Provínsia Hunan, Repúblika Populár Xina estabelese akordu kooperasaun iha seitór prioridade lima hahú kedan iha tinan 2014 estende iha tinan 2017 no kontinua to’o agora.
Hunan apoia ona povu agrikultór Manatuto hodi hasa’e produsaun iha seitór Agrikultura, Peskas, Pekuária, Veterinária no Hortikultura atu bele fortifika ekonomia Timor-Leste.
Iha Manatuto, ekipa tékniku hosi Governu Hunan harii ona sentru hortikultura, pekuária, veterinária hodi bele fahe esperiénsia bá foin-sa’e Timor-oan sira atu aprende hodi dezenvolve seitór importante hirak ne’e.
Iha tinan 2024, bainhira selebra kooperasaun Manatuto no Hunan-Xina bá dala-10, oferese hand tratór, mákina dulas hare, mákina kuda hare no ekipamentu seluk hodi apoia povu Manatuto.
Iha loron 03 Abril 2025 Governu Provínsia Hunan-Xina kontinua entrega tán ambulánsia tolu no ekipamentu fura bee moos bá povu Manatutu.
Notísia relevante:Governu husu Provínsia Hunan alarga atividade agríkola iha Manatuto no envolve komunidade
Jornalista: Abílio Elo Nini
Editór: Florencio Miranda Ximenes
