BOBONARU, 08 Maiu 2025 (TATOLI)—Komandu Jerál Polísia Nasional Timor-Leste (PNTL), kinta ne’e, halo promosaun diviza ba membru promovidu ho promosaun tranzitóriu no promosaun por antiguidade ba membru PNTL hamutuk na’in-141 iha Komandu Polisía Munisípiu Bobonaru.
Notisia Relevante: Membru PNTL 2.000-resin promovidu iha ámbitu komemorasaun ezisténsia ba dala-25
Membru hirak promovidu ba iha postu Superintendente Asistente na’in-tolu (3), Inspetór Xefe ualu (8), Inspetór neen (6), Inspetór Asistente 25, Sarjentu Xefe 45, Primeiru Sarjentu 34 no postu ajente xefe na’in-sia (9) ho ajente prinisipál na’in-11 hetan promosaun ho modalidade antiguidade.
Komandante Jerál PNTL subtitusaun, komisáriu Polisía Pedro Bello, hateten promosaun ida-ne’e sei fó hanoin ba membru sira katak aumenta diviza mak sei aumenta responsablidade, tanba balun sei asume kargu komandante no kargu importante iha instituisaun PNTL nia-laran.
“Mai, ita hotu tenke aprende siénsia Polisía hodi dezenvolve no kapasita ita-nia lideransa hodi dezenvolve PNTL. Mai, ita hotu rekoñese no valoriza importánsia husi IX Governu hodi implementa reforma estruturál PNTL. Planu Estratejiku seguransa interna 2011-2030 ne’ebé kontinua sustenta ba reforma no Dezenvolvimentu Instituisaun PNTL hanesan forsa esensiál ida hodi garante seguransa Lokál ho profisionál no moder,” Pedro Belo hateten iha nia diskursu iha serimónia promosaun duvoza ba membru PNTL sira iha Jinazíu Maliana
Komisáriu Polisiá Pedro Belo afirma, promosaun tranzitóriu ne’e nu’udar rekoñesimentu ba membru sira-ne’ebé fó ona dedikasuan ho firmeza iha dezempeñu, funsaun demostra, korajen no profisionalizmu hodi prezerva pás no aorden.
Komandante ho diviza fitun-ida ne’e husu ba membru promovidu sira atu manetin responsablidade hodi demonstra nafatin dixiplina, respeita malu, espíritu kamaradajen, unidade no leál ba superiór sira.
“Só pontu hirak ne’e mak ita kaer metin hodi dezenvolve Polisiá Nasionál Timor-Leste no povu bele haksolok hodi ita-nia rai ne’e bele hakmatek. Tau ba ita-nia pensamentu katak komunidade ezije ita nia-atendimentu. Polisiá ne’ebé profisionál signifika katak hadi’ak kualidade servisu atu sai servidór ida di’ak, protetór no sai implementadór Lei no Orden sein rezerva,” nia hateten.
Komandante Komandu Munisipiu Polisiá Bobonaru, Superintendente Xefe Agustinho Gomes da Silva, lori promovidu sira nia-naran hato’o agradesementu ba Governu espesiálmente Ministériu Interiór no Komisaun Promosaun Tranzitóriu ne’ebé durante ne’e halo esforsu makaas hodi rekoñese membru PNTL sira nia dedikasuan.
Líder másimu iha Komandu Polísia Munisípiu Bobonaru ne’e afirma ba membru sira atu demonstra kapasidade no abilidade dixiplina, profisionalizmu, dedikasaun, kompeténsia no Integridade bazeia ba nivél diviza ne’ebé Estadu liuhusi Governu atribui.
“Ha’u hato’o argumentu ne’e tanba louvór no apresiasaun Governu atravez promosaun diviza ne’ebé ita-boot sira hetan ona ne’e nunka akontese iha nasaun seluk,” Superintendente Xefe Agostinho Gomes da Silva hateten.
Hafoin ne’e, serimónia promosaun diviza ne’e iha loron hanesan sei hala’o mós ba membru sira iha Komandu Polísia Munisípiu Likisa.
Notisia Relevante: Xanana husu PNTL kontinua inspira timoroan ba dezenvolvimentu sosiedade ne’ebé pasífika
Jornalista : Sergio da Cruz
Editór : Cancio Ximenes
