DILI, 12 Maiu 2025 (TATOLI)–Ministru Justisa (MJ), Sergio Hornai, hateten Governu submete ona lista komutasaun pena no indultu hamutuk ema na’in-38 ba Prezidente Repúblika no sei hola desizaun tuir kompeténsia iha loron nasionál sira hanesan selebra loron 20 Maiu no seluk tan.
Notísia Relevamte: FRETILIN husu PR presiza haree didi’ak proposta indultu ba krime grave
“Kona-ba lista no komutasaun pena, ha’u hanesan Ministru Justisa hato’o ona liuhusi Primeiru-Ministru submete ona ba Prezidente Repúblika. Ami hato’o ona no ami sei konklui buat ruma atu Prezidente Repúblika simu atu hola desizaun, tanba ida-ne’e kompeténsia Xefe Estadu nian,” Ministru Sergio hateten ba jornalista sira iha Palásiu Prezidensiál Nicolau Lobato, Bairru Pite, segunda ne’e.
Ministru ne’e dehan, lista ne’ebé Governu submete ba Xefe Estadu hamutuk prizioneiru na’in-38 ne’ebé inklui mós Pe. Richard Daschbach.
“Lista ne’ebé ita prepara kuaze ema na’in-38 iha ne’ebé dalaruma inklui mós iha Padre, maibé sira-ne’e merese atu hetan indultu no komutasaun pena. Maibé dala ida tan, ne’e kompeténsia Prezidente Repúblika nian, ami só providénsia de’it,” Sergio dehan.
Tuir Ministru, Pe. Richard Daschbach bainhira hatudu atetude di’ak iha Prizaun laran merese atu hetan indultu tuir lei ko’alia.
“Sé nia kondenadu, nia prienxe rekezitu sira, karik nia idade avansadu, entaun ita labele halo pena de perpetua, maibé Prezidente iha hanoin rasik kona-ba ida ne’e. Maibé. lista ne’e Primeiru-Ministru no Prezidente Repúblika konsidera ba buat hotu-hotu mai husi preokupasaun sosiedade no seluk tan,” nia hakotu.
Notísia Relevamte: Xefe Estadu sei fó indultu ba prizioneiru na’in-25 iha komemorasaun 28 Novembru
Jornalista : Hortencio Sanchez
Editór : Cancio Ximenes
