Kombatente Domingos ‘Lais’ husu joven sira tenke haklaken Unidade Nasionál

BOBONARU, 20 Maiu 2025 (TATOLI)—Kombatente husi postu administrativu Bobonaru, munisípiu Bobonaru, Domingos Doutel Soares “Lais”, apela ba joventude sira atu rona no fiar malu hodi bele haklaken Unidade Nasionál ne’ebé líder rezisténsia sira kuda ona iha períodu luta libertasaun nasionál nia-laran.

Notísia Relevante: Governu aprova tema jerál “Hametin Pás no Dezenvolvimentu” ba komemorasaun 20 Maiu

Antigu membru grupu União Nasional dos Estudante Timorense (UNETIM) ne’e afirma, jerasaun foun tenke unidade tanba liu unidade mak líder no membru rezisténsia sira luta to’o ikus hamutuk ho povu konkista vitória hodi liberta patria, Timor-Leste bele hamriik hanesan país soberanu no independente iha mundu nia-leet.

Tuir nia, jerasaun foun labele radikalizmu ba doutrina ida maibé tenke sai moderadu, simu ema hotu-hotu hako’ak-malu, respeita-malu no hamutuk ho kapasidade ida-idak nian hodi kontribui ba dezenvolvimentu Nasionál.

“Ami apela ba jerasaun foun sira, jerasaun kontinuadór tenke banati nafatin tuir ami uluk etu bikan-ida ami ema na’in 10 bele han. Maibé, ohin, loron imi joven barak dezorganizadu, komesa haree-malu matan la moos, laiha kampu traballu odiu-malu ne’e labele. Unidade nasionál importante, ita hamutuk, ita bele. Se ita fahe malu, ema aproveita ita nia frakeza, nasaun seluk mak sei mai ukun ita ekonomikamente no finansialmente sira ukun hotu. Ita haree agora, ita Timor laran Xina mak domina ekonimía povu Timor hakdasak,” Nia informa ba Agência Tatoli hafoin partisipa serimínia isar Bandeira nasionál, iha kampu Futeból, postu administrativu Bobonaru, tersa ne’e.

Elementu Saudozu Komandante FALINTIL, Nino Konis Santa iha 1975 ne’e, husu ba povu hotu liuliu joven sira atu apoia kualker governasaun liuhusi hato’o opiniaun konstrutivu no labele helik-aan iha grupu hodi lansa kritika ne’ebé atu hatun malu no estraga unidade nasionál.

Kombatente ne’e obsreva, durante ne’e dezenvolvimentu iha setór balun la’o ona to’o nivél suku no aldeia maibé iha setór balun seidauk másimu.

Notísia Relevante: Médiku sira la hetan objetu ruma iha matebian Ronaldinho Mota nia isin

“Ha’u haree buat barak mak sira halo maibé hanesan ema hateten hanesan Lenuk. Hakat ne’e neineik liu maibé Timor-Leste ne’e la’ós Munisípiu Bobonaru de’it, Timor-Leste ne’e munisípiu 13 ne’e. Ita hare estrada sira komesa mákina para iha fatin-fatin, ita komesa senti ahi-naroman, ita sente estrada ne’e pelu-menus 40% ne’e la’o iha Aspal Goreng nia leten. Ita haree ospitál mós iha aldeia, suku komesa ona, eskola mós hanesan, buat hotu tenke la’o ho tempu. Ho neineik, ema ida labele halo milagra,” nia dehan.

Tuir veteranu ‘Lais’, ohin loron líder nasionál sira fahe malu no diferensa ideolojía polítika ne,e normál tanba Timor-Leste adopta sistema multi partidarizmu.

Nia argumenta problema ka naksalak ne’ebé akontese durante ne’e hanesan família ida-nia bikan ho kanuru mak tarutu iha uma-laran, tanba ne’e husu joven sira labele aproveita situasaun hodi soran líder nasionál sira.

“Maibé ami rezisténsia nunka so’e malu hotu-hotu iha vizaun ida hakarak atu hamutuk para lori rai ne’e ba oin, labele haree ba konflitu privadu, ema dehan ida-ne’e di’ak maibé ida-ne’e la di’ak. Líder nasionál hotu di’ak, sira-nia objetivu hakarak Timor ne’e ba oin. Iha naksalak uitoan, prontu ne’e hanesan bikan ho kanuru tarutu iha uma laran,” nia hateten.

Antigu membru rezisténsia ne’e mós husu ba membru Parlamentu Nasionál (PN) hapara ona aktu premanizmu no bandalizmu iha uma fukun.

“Ami foti imi ba iha ne’ebá atu diskute povu nia interrese, povu nia matan, povu nia tilun, atu ko’alia ami-nia aspirasaun iha baze. La’ós to’o iha ne’ebá mak istória malu, dehan ó la halo funu, ha’u mak halo funu, komesa sura kolen. Ha’u hanoin sura kolen hotu ona, tempu ba dezenvolvimentu Timor tenke ba oin,” nia dehan.

Notísia Relevante: Konfrontu iha Kailaku, UEP koloka membru sanulu halo atuasaun

Jornalista : Sergio da Cruz

Editór       : Cancio Ximenes