ACCOA husu empreza finaliza pista “corrida cavalo” iha Pante Makasar
OEKUSI, 22 Maiu 2025 (TATOLI) – Prezidente Asosiasaun Corrida Cavalo Oekusi Ambeno (ACCOA), Mario Muni Salu, husu ba empreza Timor-Leste, atu finaliza projetu konstrusaun pista corrida cavalo, ne’ebé konstrui iha aldeia Noeninen, suku Cunha, sub-rejiaun Pante Makasar, Rejiaun Administrativa Espesiál Oekusi Ambeno (RAEOA).
“Ho preokupasaun ne’e ami fó sujestaun ba Autoridade RAEOA no ZEEDOA, atu koordena ho kompañia atu aselera projetu ne’e tuir nia padraun, nu’udar kampu kuda nian, atu evita dezastre, ami lamenta tanba projetu ne’e tinan kotuk kedas to’o agora seidauk finaliza,” Mario Muni Salu, relata iha ámbitu abertura kompetisaun corrida cavalo iha iha suku Cunha, kuarta ne’e.
Notísia relevante:Prezidente Repúblika inaugura pista corrida cavalo iha Pante Makasar
Mario Muni Salu agradese ba Governu liuhusi Autoridade RAEOA, tanba bele kria fatin kampu corrida cavalo nian, nune’e nia espera futuru bele iha kontinuasaun ba kompetisaun kuda atu promove desportu tradisionál ne’e tanba dezde be’i-ala sira husik hela to’o ohin loron.
Hataan ba rekomendasaun ne’e, Koordenadór Zona Ekonomi Espesiál Dezenvolvimetnu Oekusi Ambeno (ZEEDOA), João Mendes Gonçalves, rekoñese konstrusaun kampu ne’e seidauk finaliza, nune’e sei koordena ho Prezidente Autoridade RAEOA hodi hadi’a.
“Kampu ne’e seidauk hotu, ohin ha’u rona ita-nia reklamasaun ne’e loos duni, kompañia tenke finaliza, maibé ha’u dehan nia dezeñu seidauk kompletu, kampu ne’e sei aterru sa’e to’o leten, ha’u sei koordena ho Prezidente Autoridade RAEOA atu hadi’a ita-nia kampu ne’e, tanba ami mai iha ne’e la’os kompete malu maibé atu kompleta malu,” nia dehan.
Entretantu, pista ba kuda halai taru ne’e ho nia medida metru 1.200, ne’ebé obra ne’e ezekuta husi empreza Timor-Lorosa’e ho valór kontratu rihun $270.
Notísia relevante:Autoridade RAEOA realiza kompetisaun “corrida cavalo” hodi festeza 20 Maiu
Jornalista: Abílio Elo Nini
Editór: Florencio Miranda Ximenes
